ĠUDITTA 9 - Maltese Bible with DC

Kapitlu 9It-talba ta’ Ġuditta

1Imbagħad, fl-istess ħin li fih kienu qegħdin joffru l-inċens ta’ filgħaxija fit-tempju ta’ Alla f’Ġerusalemm, Ġuditta nxteħtet wiċċha fl-art, xeħtet l-irmied fuq rasha, kixfet il-libsa tax-xkejjer li kellha fuqha, u għolliet leħinha, u għajtet quddiem il-Mulej u qalet:

2“Mulej Alla ta’ missieri Simgħon, li tajtu xabla f’idu biex jitħallas mill-barranin li ħallew il-ħżiem ta’ xebba biex ikasbruha; kixfulha ġenbejha għaż-żebliħ, u kasbrulha ġufha għall-għajb. Int għedt: ‘Ma jkunx hekk,’ u huma hekk għamlu!

3“Għalhekk int irħejt għall-qatla l-kapijiet tagħhom u l-friex tagħhom, li jaf bil-qerq li ġara, għad-dmija; ilqatt l-ilsiera u s-sidien, u l-ħakkiema fuq it-tron tagħhom;

4irħejt in-nisa tagħhom għall-priża, il-bniet tagħhom għall-jasar, u l-ġid tagħhom għat-tqassim fost l-ulied il-maħbubin tiegħek, għax dawn, kollha ħeġġa għalik, stkerrhu t-tkasbir ta’ demmhom, u sejħu l-għajnuna tiegħek.

“O Alla, Alla tiegħi, isma’ lili, li jien armla!

5Int għamilt dak li sar, dak li sar qablu u dak li sar warajh. Int taf il-ħwejjeġ ta’ issa, u dawk li għad iridu jiġu, u dak li int taħseb iseħħ.

6“Il-ħwejjeġ li int fassalt minn qabel seħħew u qalu: ‘Hawn aħna’, it-toroq tiegħek kollha int tħejji minn qabel, u l-ġudizzju tiegħek ġej mill-għerf minn qabel.

7“Ara issa l-Assiri kotrana fl-eżerċtu tagħhom, imkabbra biż-żwiemel u r-rikkieba, jiftaħru bil-qawwa tal-fanterija, jittamaw fit-tarkiet u l-lanez tagħhom, fil-qaws u l-iżbandoli, ma jagħrfux li int is-Sid, il-qerried tal-gwerer.

8“Is-Sid hu ismek! Farrak il-qawwa tagħhom bis-saħħa tiegħek, xejjen il-qawwa tagħhom bis-saħna tiegħek. Huma jridu jżebilħu t-tempju tiegħek, itebbgħu fejn tgħammar int bl-isem glorjuż tiegħek, ikissru bil-ħadid il-qrun tal-artal tiegħek.

9“Ħares lejn is-suppervja tagħhom, ibgħat il-korla tiegħek fuq rashom, agħti lil din l-id ta’ armla l-forza li tagħmel li għandi f’rasi.

10“Olqot bil-qerq ta’ xufftejja l-ilsir mas-sid, u s-sid mal-qaddej, farrak il-kburija tagħhom bl-id ta’ mara.

11“Il-qawwa tiegħek mhijiex fil-kotra tal-eżerċti, lanqas is-setgħa tiegħek fil-qawwijin. Iżda int Alla tal-imsejknin, l-għajnuna taż-żgħar, ħajt tal-kenn għad-dgħajfin, protettur tal-mitluqin, salvatur tan-nies bla tama.

12“Iva. Iva, Alla ta’ missieri! Alla tal-wirt ta’ Iżrael! Sid is-smewwiet u l-art! Ħallieq tal-ibħra! Sultan tal-ħolqien tiegħek! Isma’ inti t-talba tiegħi.

13“Agħmel li bil-kelma u l-qerq tiegħi nidrobhom u nferihom, lil dawk li jridu jagħmlu l-ħsara lill-patt tiegħek, lit-tempju tiegħek u ’l-quċċata tal-muntanja ta’ Sijon, u d-dar tal-għamara ta’ wliedek.

14“Agħmel li l-poplu tiegħek kollu, u t-tribujiet kollha, jagħrfu u jaraw, li int Alla, Alla fuq kull qawwa u fuq kull setgħa, u ħadd u ħadd ħliefek mhu tarka għall-poplu ta’ Iżrael.”