1L-għerf tal-umli jgħinu jgħolli rasu,
u jqiegħdu bilqiegħda qalb il-kbarat.
2Tfaħħarx raġel minħabba ġmielu;
u taħmilx bniedem minħabba wiċċu.
3In-naħla hi żgħira fost il-ħlejjaq li jtiru,
imma dak li tagħmel hu l-aqwa fost il-ħlewwa.
4Tiftaħarx għax ilbiesek hu mill-aħjar,
u titkabbarx meta mfaħħar:
għax tal-għaġeb huma għemejjel il-Mulej,
u dak li jagħmel hu mistur għall-bniedem.
5Ħafna slaten sfaw bilqiegħda fl-art,
u dak li ħadd ma basru xedd il-kuruna f’rasu.
6Ħafna slaten sfaw għalkollox bla ġieħ,
u nies ta’ ġieħ ġew mogħtija f’idejn oħrajn.Riflessjoni bil-kalma
7Qabel ma tistħarreġ sewwa, tikkundannax;
l-ewwel aħsibha sewwa, u mbagħad ċanfar.
8Isma’ qabel ma twieġeb,
u twaqqafx diskors f’nofsu.
9Dwar ħaġa li ma tiswiex għalik titlewwimx.
Fil-kawżi tal-midinbin la tindaħalx.
10Ibni, qis li ma titgħabbiex b’ħafna xogħol;
jekk iżżidu ma teħlisx mill-piena,
jekk tiġri warajh ma tilħqux,
u billi taħrab ma teħlisx minnu.
11Hemm min jagħmel xogħol iebes, ibati u jistinka,
imma xorta jibqa’ lura għall-aħħar.Fiduċja f’Alla
12Hemm min hu kajman u jeħtieġ l-għajnuna,
nieqes mill-ħila u mimli bil-faqar;
imma l-Mulej jitfa’ għajnejh fuqu biex jagħmillu l-ġid,
jerfgħu mix-xejn tiegħu,
13u jgħinu jerfa’ ’l fuq rasu,
hekk li ħafna jistagħġbu bih.
14It-tajjeb u l-ħażin, il-ħajja u l-mewt,
il-faqar u l-għana jiġu mill-Mulej.
15Don tal-Mulej li wieħed ikun għaref
u l-Liġi jifhimha, u jagħrafha;
l-imħabba u d-drawwa ta’ għemejjel tajba minnu ġejjin.
16L-iżball u d-dlam ġew maħluqa għall-midinbin,
dawk li jiftaħru bil-ħażen,
il-ħażen jikber magħhom.
17Id-don tal-Mulej jibqa’ ma’ dawk li jqimuh,
u r-rieda tajba tiegħu timliehom bil-ġid għal dejjem.
18Hemm min jistagħna għax għaqli u jfaddal,
u dan ikun sehem xortih;
19meta jgħid: ‘Sibt il-mistrieħ,
issa noqgħod niekol mill-ġid li għandi,’
ma jafx kemm se jgħaddi żmien,
u jħallih warajh lill-oħrajn u jmut.
20Oqgħod għal dak li ntrabatt bih u tħabbeb miegħu,
u idħol fi xjuħitek int u għadek taħdem.
21Tistagħġibx b’dak li jagħmel il-midneb;
ikollok fiduċja fil-Mulej,
u żomm sħiħ fit-taħbit tiegħek,
għax hi ħaġa ħafifa f’għajnejn il-Mulej,
li malajr u f’daqqa waħda jagħni lill-fqir.
22Il-barka tal-Mulej fil-ħlas tat-twajbin,
u ħin bla waqt ikabbar il-barka tiegħu.
23Tgħidx: ‘X’jonqosni, u ’l quddiem x’ġid se jkolli?’
24Tgħidx: ‘Għandi kulma neħtieġ,
u ’l quddiem liema għawġ jista’ jkolli?’
25Fi żmien il-ġid jintesa l-għawġ,
u fi żmien l-għawġ jintesa l-ġid.
26Ħaġa ħafifa għall-Mulej
li meta l-bniedem itemm ħajtu jħallsu skont imġibtu.
27Għawġ ta’ siegħa jnessi l-kumditajiet;
u għemejjel il-bniedem jinkixfulu fi tmiem ħajtu.
28Issejjaħ lil ħadd imbierek qabel ma jmut;
bniedem issir tafu f’uliedu.
Tafdax f’min hu ħażin29Iddaħħalx f’darek lil kulħadd,
għax ħafna n-nases ta’ min jimxi bil-ħżunija.
30Qalb il-kburi bħal perniċi tal-insib f’gaġġa,
u bħal wieħed jgħasses ħa jarak taqa’;
31għax jonsob biex it-tajjeb idawru f’ħażen,
u jmaqdar dak li ħaqqu tifħir.
32Bi xrara nar tieħu kotra ġamar,
u l-bniedem midneb jgħasses biex ixerred id-demm.
33Għasses għall-ħażin għax ħażin ifassal,
li ma jmurx jitfa’ fuqek għajb li jibqagħlek.
34Ilqa’ barrani għandek, u jħawdek b’ħafna taqlib,
u jagħmlek barrani għal niesek.
Who We AreWhat We EelieveWhat We Do
2025 by iamachristian.org,Inc All rights reserved.
