PROVERBJI 24 - Maltese Bible with DC

Kapitlu 24

1M’għandekx għalfejn tgħir għall-ħżiena

jew tixtieq tagħmilha magħhom;

2għax fuq id-dnewwa jaħseb moħħhom,

u kliem l-għawġ joħroġ minn fommhom.

3Id-dar bl-għerf tinbena

u bid-dehen tissaħħaħ;

4bl-għaqal jimtlew il-kmamar,

b’kull ġid għażiż u jogħġob.

5L-għaref aqwa minn wieħed b’saħħtu,

min għandu t-tagħlim aqwa minn dak li jiflaħ;

6għax bit-tmexxija għaqlija tintrebaħ il-gwerra,

b’ħafna pariri tinkiseb ir-rebħa.

7L-għerf għoli wisq għall-iblah;

f’bieb il-belt l-iblah ma jiftaħx fommu.

8Min jaħseb biex jagħmel id-deni,

jissejjaħ bniedem tal-għawġ.

9Dnubiet huma ħsibijiet l-iblah,

u l-arroganti jistmelluh in-nies.

10Jekk int tintreħa fir-riżq it-tajjeb,

x’saħħa għandek fir-riżq il-ħażin?

11Lil min hu meħud għall-mewt eħilsu,

lil min hu mkaxkar għall-qatla salvah.

12Jekk int tgħid: “Ma kontx naf b’dan”;

taħseb li Dak, li jiżen il-qlub, ma jindunax?

Dak li jgħasses fuqek, kollox jaf;

Hu jrodd lil kulħadd skont għemilu.

13Ibni, kul l-għasel, għax hu tajjeb,

u l-qtar tax-xehda, għax togħmtu ħelwa.

14Kun af li hekk hu l-għerf għalik;

jekk issibu, jiswielek għal li ġej,

u t-tama tiegħek ma tkunx fiergħa.

15Toqgħodx tissajja għal fejn joqgħod il-ġust,

tagħmilx ħsara lil daru.

16Imqar jekk il-ġust jaqa’ seba’ darbiet, dejjem jerġa’ jqum,

imma l-ħżiena mill-ħsara jibqgħu mifxula.

17Tifraħx meta jaqa’ l-għadu tiegħek,

tithenniex f’qalbek meta jogħtor;

18jekk jara dan il-Mulej ma jifraħx bik,

u lilu jneħħilu l-korla tiegħu minn fuqu.

19Tinkeddx minħabba l-ħżiena,

u tgħirx għal min jagħmel il-ħażen;

20għax il-ħżiena m’għandhomx tama għal li ġej,

u d-dawl tal-ħżiena għad jintefa.

21Ibni, ibża’ mill-Mulej u mis-sultan,

u teħodha qatt kontra tagħhom it-tnejn;

22għax għal għarrieda minnhom tiġi l-ħsara,

u l-qerda li minnhom tiġi min jagħrafha?

Kliem l-għorrief

23Dawn ukoll kliem l-għorrief:

mhux sewwa żżomm ma’ dak u mal-ieħor fil-ħaqq.

24Min lil ħati jgħidlu: “Int bla ħtija,”

jisħtuh il-popli, jistkerrhuh il-ġnus;

25imma dawk li jikkundannaw il-ħati riżqhom tajjeb,

ikollhom fuqhom barka bil-kotra.

26Min jagħti tweġiba onesta,

daqs kemm kieku jagħti bewsa fuq ix-xufftejn.

27Qis li xogħlok ikun f’postu,

u li jkollok kollox lest għal xogħol ir-raba’;

u mbagħad ibni darek.

28Tixhidx bla raġuni kontra għajrek,

u tqarraqx bih b’xufftejk.

29Tgħidx: “Kif għamilli hu, nagħmillu jien;

rroddlu skont għemilu.”

30Għaddejt ħdejn l-għalqa ta’ wieħed għażżien,

ħdejn l-għalqa tad-dwieli ta’ wieħed bla moħħ;

31u rajtha kollha ħaxix ħażin,

miksija kollha bil-ħurrieq,

u l-ħitan tagħha mġarrfa.

32Ħarist lejha u qgħadt naħseb;

rajtha u ħadt tagħlima:

33daqqa tongħos, daqqa torqod,

daqqa torbot idejk biex tistrieħ;

34u jiġi fuqek bħal ħalliel il-faqar,

u bħal wieħed armat l-għaks.