MIKEA 6 - Maltese Bible with DC

Kapitlu 6Il-Mulej jagħmel ħaqq mill-poplu tiegħu

1Isimgħu, mela, dan li jgħid il-Mulej!

Qum, iddefendi ruħek quddiem il-muntanji,

ħalli l-għoljiet jisimgħu leħnek!

2Isimgħu, muntanji, it-tilwima tal-Mulej,

iftħu widnejkom, sisien l-art,

għax din hi tilwima tal-Mulej mal-poplu tiegħu,

ma’ Iżrael għandu xi jgħid:

3“X’għamiltlek jiena, poplu tiegħi?

Fiex dejjaqtek? Weġibni.

4Għax jien tellajtek mill-art tal-Eġittu,

fdejtek minn dar il-jasar;

jien bgħatt quddiemek ’il Mosè,

lil Aron u ’l Mirjam.

5Ftakar, iva, poplu tiegħi:

biex kien ħareġ Balak, sultan ta’ Mowab,

u x’wieġbu Balgħam bin Begħor?

Ftakar ma’ xiex iltqajt

minn Sittim sa Gilgal,

ħalli b’hekk tagħraf

l-għemejjel sewwa tal-Mulej.”

6“Biex se nersaq quddiem il-Mulej,

u nitbaxxa quddiem Alla l-Għoli?

Se nersaq quddiemu b’sagrifiċċji tal-ħruq

u b’għoġiela ta’ sena?

7Il-Mulej se jogħġbuh l-eluf ta’ mtaten,

u l-għaxriet ta’ eluf ta’ widien ta’ żejt?

Se noffrilu ’l ibni l-kbir

b’sagrifiċċju għad-dnub tiegħi?

Se nagħtih l-ewwel wild tiegħi,

il-frott ta’ ħdani għal ħtijieti?”

8Bniedem, huwa wriek x’inhu tajjeb

u x’jistenna minnek il-Mulej:

li tagħmel dak li hu ġust,

li tħobb u tkun ħanin,

u li tkun umli fl-imġiba tiegħek

ma’ Alla tiegħek.”Għall-qarrieqa tal-belt

9Leħen il-Mulej isejjaħ il-belt,

jiswa li wieħed jibża’ minn ismek!

“Isimgħu tribujiet u ġemgħa tal-belt!

10Se ninsa jiena dar il-ħażin,

li jiġma’ fiha t-teżori tal-ħażen,

u s-saħta tal-efa mnaqqsa?

11U l-miżien ħażin,

u l-borża bil-bċejjeċ foloz tal-użin,

nista’ jien inqishom b’tajba?

12L-għonja tagħha m’ għandhomx ħlief moħqrija

u n-nies tagħha kollhom kliem b’ieħor,

u lsienhom qerq ġo fommhom.

13Jien ukoll, mela, inneħħilek saħħtek bis-swat,

u nagħmlek ħerba għal ħtijietek.

14Tibda tiekol bla ma tixba’,

titħalla bl-istonku tiegħek vojt,

twarrab xi ħaġa u ma tfaddal xejn,

u dak li tfaddal nitlaqhulek għax-xabla.

15Tiżra’ u ma taħsadx,

tisħaq iż-żebbuġ, u ma tindilikx biż-żejt,

tagħsar l-għeneb, u ma tixrobx inbid.

16Int ħarist il-liġijiet ta’ Għomri

u d-drawwiet kollha tad-dar ta’ Aħab,

u mxejt fit-triqat li fasslu huma,

biex nagħmel minnek ħerba,

u ’l niesek jiddieħku bihom,

u int titgħabba biż-żebliħ tal-ġnus.”