MIKEA 3 - Maltese Bible with DC

Kapitlu 3Għall-kbarat li jaħqru l-poplu

1Imbagħad jien għedt:

“Issa isimgħu, kbarat ta’ Ġakobb,

u mexxejja tad-dar ta’ Iżrael!

Mhux lilkom imiss li tagħrfu l-ġustizzja?

2Intom għedewwa tat-tjieba u ħbieb tal-ħażen,

li tisolħulhom il-ġilda minn fuqhom,

u laħamhom minn fuq għadamhom?

3Dawn huma li jieklu laħam il-poplu tiegħi;

iqaxxruhom u jfarrkulhom għadamhom;

iqattgħuhom qishom laħam għall-borom,

bħal biċċa laħam f’kazzola,

4u mbagħad jgħajtu lill-Mulej.

Iżda hu ma jweġibhomx;

hu jaħbi wiċċu minnhom f’dak iż-żmien,

talli kulma għamlu għamluh ħażin.Għall-profeti mixtrija

5Hekk jgħid il-Mulej dwar il-profeti,

li jtellfu t-triq lill-poplu tiegħi;

li jgħidu “Paċi!”

jekk ikollhom xi jgerrmu bi snienhom,

imma jħejju gwerra qaddisa

għal min ma jagħtihom xejn għal ħalqhom.

6Għalhekk ikollkom lejl fuqkom

u ma tarawx dehriet;

ikollkom dlam fuqkom

mingħajr tħabbir;

u tgħib ix-xemx għall-profeti,

u jiddallam għalihom il-jum.

7Imbagħad il-veġġenti jkollhom mniex jistħu,

il-ħabbara jħammru wiċċhom,

u lkoll jibdew jgħattu xufftejhom,

għax ebda tweġiba ma jkollhom minn Alla.

8Imma jien, jien mimli bil-qawwa,

bl-ispirtu tal-Mulej,

bil-ġustizzja u l-kuraġġ,

biex nuri ’l Ġakobb id-dnub tiegħu,

u l-ħtijiet tiegħu lil Iżrael.

Titħabbar il-qerda ta’ Sijon

9Isimgħu dan, mela,

kbarat tad-dar ta’ Ġakobb,

u mexxejja tad-dar ta’ Iżrael,

li għandkom mibegħda għall-ġustizzja,

u tħassru kulma hu sewwa,

10li tibnu ’l Sijon bid-demm,

u lil Ġerusalemm bil-ħażen.

11Il-kapijiet tagħha jinxtraw biex jagħmlu l-ġustizzja,

il-qassisin tagħha jridu l-ħlas biex jgħallmu,

il-profeti tagħha jridu l-flus biex jeħbru.

U madankollu jistrieħu fuq il-Mulej u jgħidu:

“Mhuwiex fostna l-Mulej?

Ħsara ma tiġix fuqna!”

12Għalhekk, minħabba fikom,

Sijon għad tinħarat bħal għalqa,

borġ ġebel għad issir Ġerusalemm,

u l-muntanja tat-tempju għolja kollha siġar.