1Iva, araw, is-Sid, il-Mulej tal-eżerċti
ineħħi minn Ġerusalemm u minn Ġuda
kull irfid u rifda:
kull matmura ta’ ħobż u kull ħażna ta’ ilma;
2il-qalbieni u l-gwerrier,
l-imħallef u l-profeta,
il-bassâr u l-anzjan,
3il-fizzjal tal-ħamsin u n-nobbli,
il-kunsillier u l-imgħallem tas-sħarijiet,
u l-imħarreġ fil-magħmul.
4U nagħtihom tfal bi prinċpijiethom;
u t-trabi għad jaħkmuhom.
5Il-poplu jgħakkes wieħed lil ieħor,
ħabib lil ieħor.
Iż-żgħażagħ jiżżarġnu fuq ix-xjuħ,
il-bniedem ta’ xejn fuq in-nobbli.
6U jaqbad wieħed lil ħuh f’dar missieru u jgħidlu:
“Int għandek mantar, ejja u aħkem fuqna,
ħa tkun din il-ħerba taħt idejk.”
7Imma dakinhar dan iwieġeb:
“Jien m’iniex tabib,
m’għandix f’dari u la ħobż u lanqas mantar.
La tagħmlunix ħakem tal-poplu!”
8Għax iġġarrfet Ġerusalemm u Ġuda waqgħet.
Għax ilsienhom u għemilhom kontra l-Mulej,
biex jeħduha kontra l-glorja tiegħu.
9Il-ħarsa ta’ wiċċhom tixhed kontrihom,
dnubiethom bħal Sodoma jxandru bla ma jaħbuhom.
Ħażin għalihom,
għax b’idejhom iġibu fuqhom stess il-ħsara.
10Hieni l-ġust għax tiġih tajba,
għax għad jiekol frott għemilu.
11Gwaj għall-ħażin, għax tiġih ħażina,
għax għemil idejh għad jilħquh.
12Il-poplu tiegħi, it-tfal għad jaħkmuhom,
u n-nisa għad iżarġnu fuqhom.
Poplu tiegħi, ħżiena huma l-mexxejja tiegħek,
iħarbtu t-triq tal-mogħdija tiegħek.
13Il-Mulej iqum biex jeħodha magħhom,
u jagħmel ħaqq mill-poplu tiegħu.
14Il-Mulej ġej jagħmel il-ħaqq
mill-anzjani u l-prinċpijiet tal-poplu tiegħu:
“Intom ħarbattu qasam id-dwieli,
sraqtu l-fqir u mlejtu djarkom.
15Għaliex tgħakksu l-poplu tiegħi,
u titħnu wiċċ il-fqir?”
Oraklu ta’ Sidi, il-Mulej tal-eżerċti.Il-ġudizzju ta’ bniet Sijon
16U jgħid il-Mulej:
“Il-bniet ta’ Sijon tkabbru,
jimxu b’għonqhom imserdak,
u b’għajnejhom jegħmżu,
jgħaddu jiżżegilgu,
u jċekċku ċ-ċnieċel ta’ riġlejhom.
17Għalhekk Sidi għad jiksi bil-qxur
il-qorriegħa ta’ bniet Sijon,
u għerithom jikxfilhom il-Mulej.
18Dakinhar Sidi jneżżagħhom
mit-tlellix tal-ħoloq tal-għekiesi,
mix-xmux u l-oqmra,
19mill-imsielet u l-brazzuletti,
mill-filoxx
20u l-faxex tar-ras,
mill-ġawhar imsensel mar-riġlejn,
mit-trieħi u l-kwies tal-fwejjaħ,
mill-amuleti
21u ċ-ċrieket,
mill-ħoloq għall-imnieħer,
22mill-ilbies rikk u mill-imnatar,
mix-xalel u mill-boroż,
23mill-mirja u x-xalpi tal-filoxx,
mill-ilbies tal-għażel fin,
mit-trabant u mill-krâkar.
24U jkun hemm dakinhar
minflok fwieħa, intejjen;
minflok trieħi, ħbula;
minflok xagħar midfur, qriegħi;
minflok ilbies rikk, tgeżwir bix-xkejjer;
minflok ġmiel, it-timbru tal-jasar.
25L-irġiel tiegħek jaqgħu taħt ix-xabla,
u l-qalbiena fit-taqtigħa.
26U l-bwieb tagħha jibku u jixhru,
u hi għerja, mitluqa mal-art.
Who We AreWhat We EelieveWhat We Do
2025 by iamachristian.org,Inc All rights reserved.
