PROVERBJI 3 - Maltese Bible with DC

Kapitlu 3Il-ġmiel ta’ ħajja sewwa

1Ibni, tinsiex it-tagħlim tiegħi,

iżda żomm f’qalbek il-kmandamenti tiegħi;

2għax għomor twil u ħafna snin,

u riżq tajjeb iġibulek.

3It-tjieba u l-fedeltà tħallihomx iħalluk;

ma’ għonqok orbothom; iktibhom f’qalbek.

4Hekk issib xorti u isem tajjeb

quddiem Alla u l-bnedmin.

5Ittama fil-Mulej b’qalbek kollha,

u tafdax fl-għaqal tiegħek.

6Fih aħseb f’kulma tagħmel,

u hu jwittilek triqatek.

7Toqgħodx taħseb kemm inti għaref,

imma ibża’ mill-Mulej u warrab mill-ħażen.

8Ħa jkun dan is-saħħa ta’ ġismek,

u d-duwa għal għadmek.

9Weġġaħ lill-Mulej b’ġidek,

u bl-ewwel dħul tal-qligħ tiegħek;

10u jimtlew bil-qamħ l-imħażen tiegħek,

u l-imgħasar bl-inbid ifuru.

11Ibni, tistmerrx it-tagħlim tal-Mulej,

u tiddejjaqx bit-twiddib tiegħu,

12għax il-Mulej iwiddeb lil min iħobb,

u jgħakkes ’l ibnu l-maħbub.

13Hieni min isib l-għerf,

u l-bniedem li jikseb id-dehen,

14għax qligħ l-għerf jiswa aktar mill-fidda,

u l-ġid li jġiblu hu aħjar mid-deheb.

15L-għerf hu egħżeż mill-ħaġar prezzjuż,

kulma tixtieq qalbek ma jiswiex daqsu.

16Għomor twil f’idu l-leminija,

għana u ġieħ fix-xellugija.

17Fihom għaxqa triqatu,

kollha sliem mogħdijietu.

18Hu siġra tal-ħajja għal min iħaddnu;

hieni hu min iżomm sħiħ miegħu.

19Bl-għerf il-Mulej waqqaf l-art,

bid-dehen saħħaħ is-smewwiet;

20bl-għerf tiegħu nfetħu qigħan il-baħar,

u s-sħab iraxxax il-qtar tan-nida.

21Ibni, żomm l-għaqal u l-qjies,

twarrabhomx minn quddiem għajnejk;

22huma jkunu l-ħajja ta’ ruħek,

u t-tiżjin ta’ għonqok.

23Imbagħad timxi bla biża’ fi triqtek,

u ma jogħtrux riġlejk.

24Jekk tmur torqod, ma jkollokx għax tibża’;

xħin timtedd, jiġik ħelu l-irqad.

25Tibżax meta tara l-boloh jitwerwru,

jew tiġi fuqhom il-ħsara tal-ħżiena,

26għax il-Mulej ikun maġenbek,

u jħarislek riġlek biex ma tinqabadx.

L-imġiba mal-proxxmu

27Min ħaqqu l-ġid tiċħadhulux,

meta dan tista’ tagħmlu.

28Tgħidx lil għajrek: “Mur, u erġa’ ejja;

nagħtik għada,” meta għandek mnejn tagħtih.

29Tfassalx il-ħsara kontra għajrek,

hu u jserraħ bit-tama fik.

30Titlewwimx ma’ ħaddieħor għal xejn b’xejn,

jekk ma għamillek l-ebda deni.

31Tgħirx għall-bniedem vjolenti,

u titħajjarx timxi fuq xi mġiba tiegħu;

32għax min jimxi bl-imgħawweġ jistkerrhu l-Mulej,

imma f’idejh huma dawk li jimxu bis-sewwa.

33Is-saħta tal-Mulej f’dar il-ħżiena,

imma hu jbierek djar it-tajbin.

34Min iżeblaħ lill-oħrajn jistmellu l-Mulej,

imma lit-twajbin jagħtihom il-grazzja.

35L-għorrief jirtu l-ġieħ,

imma l-boloh jiksbu l-għajb.