ĠEREMIJA 23 - Maltese Bible with DC

Kapitlu 23Is-saltna Messjanika

1“Gwaj għar-rgħajja li jeqirdu u jxerrdu

l-merħla tal-mergħa tiegħi,

oraklu tal-Mulej.

2Għalhekk dan jgħid il-Mulej,

Alla ta’ Iżrael, lir-rgħajja,

li jirgħu l-poplu tiegħi:

‘Intom xerridtu n-nagħaġ tiegħi,

gerrixtuhom u ma ħadtux aktar ħsiebhom.

Arawni, se naħseb fikom jien

minħabba l-ħażen ta’ għemilkom,

oraklu tal-Mulej.

3U jiena niġbor il-fdal tal-nagħaġ tiegħi

mill-artijiet kollha li xerridthom fihom,

u rreġġagħhom lura lejn il-mergħa tagħhom,

u jnisslu u joktru.

4U nqiegħed fuqhom rgħajja li jirgħuhom,

u ma jitbeżżgħux aktar, ma jitwaħħxux;

u ħadd minnhom ma jonqos,

oraklu tal-Mulej.

5Araw, għad jasal żmien,

oraklu tal-Mulej,

meta nqajjem lil David rimja ġusta,

li jsaltan ta’ sultan,

u jmexxi bil-għaqal

u jagħmel is-sewwa u l-ħaqq fil-pajjiż.

6Fi żmienu Ġuda jkun salv,

U Iżrael jgħammar fiż-żgur.

U dan hu l-isem li jsejħulu:

‘Il-Mulej is-Sewwa tagħna.’

7Għalhekk: Arawhom, ġejjin jiem,

oraklu tal-Mulej,

meta ma jgħidux iżjed

‘Daqs kemm hu ħaj il-Mulej,

li tella’ ’l ulied Iżrael mill-art tal-Eġittu’

8imma: ‘Daqs kemm hu ħaj il-Mulej,

li tella’ u ħareġ in-nisel ta’ dar Iżrael

mill-art tat-Tramuntana,

u mill-artijiet kollha li fihom xerridhom.’

Imbagħad jistgħu jgħammru f’arthom.”

Orakli kontra l-Profeti

9Għall-profeti:

Qalbi nqasmet ġewwa fija;

għadmi kollu mkexkex;

sirt qisni bniedem fis-sakra,

bħal raġel ħadu l-inbid,

minħabba l-Mulej,

u minħabba l-kliem imqaddes tiegħu.

10Għax il-pajjiż miżgħud bl-adulterji;

minħabba fihom l-art tbikkik,

u l-mergħat fid-deżert nixfu.

U l-ġiri tagħhom kollu ħażin,

u saħħithom l-inġustizzja.

11Għax imqar il-profeta u l-qassis,

ilkoll midgħajja.

Saħansitra f’dari sibt ħżunithom,

oraklu tal-Mulej.

12Għalhekk triqthom tkunilhom

mogħdija kollha żliq,

fid-dlam jinxteħtu fiha u jogħtru,

għax inġib fuqhom il-ħsara

fis-sena ta’ kastighom,

oraklu tal-Mulej.

13U fost il-profeti ta’ Samarija

rajt ukoll ħwejjeġ li jdardruk:

iħabbru f’isem Bagħal,

u jqarrqu b’Iżrael il-poplu tiegħi.

14Fost il-profeti ta’ Ġerusalemm, imbagħad,

rajt ħwejjeġ ikexkxuk:

adulterji u mġiba giddieba;

isaħħu id il-ħżiena, biex ħadd minnhom

ma jerġa’ lura minn ħżunitu.

Ilkoll għalija qishom Sodoma,

u n-nies tagħha bħal Gomorra.

15Għalhekk dan jgħid il-Mulej tal-eżerċti kontra l-profeti:

“Arawni, sa nitmagħhom l-absint,

u nisqihom l-ilma avvelenat,

għax mingħand il-profeti ta’ Ġerusalemm

xtered il-ħażen mal-art kollha.”

16Dan jgħid il-Mulej tal-eżerċti:

“La tisimgħux kliem li jħabbrulkom il-profeti

biex jimlewlkom moħħkom bil-frugħat.

Jgħidulkom li jiġihom f’qalbhom,

u mhux li jiġihom minn fomm il-Mulej.

17Qegħdin jgħidulhom lil dawk li jistmerru l-kelma tal-Mulej:

‘Ikollkom is-sliem,’

u lil dawk li jagħmlu li jiġihom f’moħħhom

jgħidulhom: ‘Ebda deni mhu se jilħaqkom!”

18Min minnhom qagħad fil-kunsill tal-Mulej,

u ra u sama’ kelmtu?

Min ta widen għal kelmtu biex isemmagħha?

19Arawh, ir-riefnu tal-Mulej!

Xegħel għadbu bħal tempesta qawwija,

li se tfaqqa’ fuq ras il-ħżiena.

20Għax is-saħna tal-Mulej ma terġax lura,

qabel ma tkun għamlet u temmet

ħsieb moħħu.

Fl-aħħar jiem tifhmuh sewwa.

21Ma bgħatthomx jien dawn il-profeti,

għalkemm huma marru jiġru!

Ma kellimthomx,

għalkemm huma marru jħabbru.

22Kieku qagħdu fil-kunsill tiegħi,

kienu jsemmgħu kelmti lill-poplu tiegħi,

u jreġġgħuhom lura minn triqathom,

u mill-ħażen ta’ għemilhom.

Il-ħolm u l-qerq tal-profeti foloz

23“Jaqaw jien Alla fil-qrib biss,

oraklu tal-Mulej,

mhux ukoll Alla fil-bogħod?

24Jista’ bniedem jistaħba fil-moħbiet,

u jien ma narahx?

Oraklu tal-Mulej.

Ma nimliex jiena

is-sema u l-art?

Oraklu tal-Mulej.

25“Jien smajt x’qalu l-profeti li jħabbru l-gideb f’ismi u jgħidulhom: ‘Kelli ħolma! Kelli ħolma!’

26Kemm se jdum sejjer dan? Jaqaw jien f’qalb il-profeti li jħabbru l-gideb, li jħabbru t-thewdin ta’ moħħhom?

27Jaħsbu li bil-ħolm tagħhom, li jgħidu wieħed lil ieħor, se jnessu ismi lill-poplu, bħalma nsew ismi missirijiethom minħabba Bagħal?? Oraklu tal-Mulej.

29Jaqaw mhijiex kelmti bħan-nar,

jew bħal imterqa tfarrak il-blat?

Oraklu tal-Mulej.

30“Għalhekk jiena kontra l-profeti, Oraklu tal-Mulej, li jisirqu kliemi mingħand xulxin.

33“Meta jistaqsik dan il-poplu, jew xi profeta jew xi qassis, u jgħidlek: ‘X’inhu l-oraklu tal-Mulej?’ int għandek twieġeb: ‘Intom it-toqol tal-Mulej! Għalhekk jiena rmejtkom, jgħid il-Mulej.’

34“U jekk xi profeta jew xi qassis jew xi ħadd mill-poplu jsemmi ‘l-oraklu tal-Mulej’, jien nikkastiga ’l dak il-bniedem u l-familja tiegħu.

35“Hekk għandkom tistaqsu wieħed lil ieħor bejnietkom: ‘X’wieġeb il-Mulej?’ jew ‘X’qal il-Mulej?’

36Imma l-oraklu tal-Mulej m’għandkomx issemmuh aktar, għaliex għal dak li jkun, l-oraklu jkun kliemu stess. Intom qegħdin tgħawġu l-kliem ta’ Alla l-ħaj, il-Mulej tal-eżerċti, Alla tagħna.

37Hekk għandkom tistaqsu lill-profeta: ‘X’wieġeb il-Mulej?’ jew ‘X’qal il-Mulej?’

38Imma jekk tibqgħu tgħidu ‘l-oraklu tal-Mulej’, allura dan jgħid il-Mulej: ‘Talli intom bqajtu tgħidu din il-kelma: ‘oraklu tal-Mulej’, meta jien għedtilkom biex ma tgħidux: ‘oraklu tal-Mulej’,

39arawni, jien se nerfagħkom bħal toqol u nwaddabkom ’il barra minn quddiemi, lilkom u lill-belt li tajt lilkom u lil missirijietkom,

40inniżżel għajb fuqkom għal dejjem u mistħija għal dejjem li qatt ma jintesew.’ ”