1Hemm ċanfira li mhijiex f’waqtha,
u hemm is-skiet tal-għaqli.
2Kemm hu isbaħ li wieħed iċanfar milli jagħdab!
3Min jistqarr dnubu jeħles mill-kastig.
4Bħal ewnuku mlebleb biex ikasbar xbejba,
hekk min irid jieħu raġun bis-saħħa.
5Hemm min iżomm sieket u jgħodduh b’għaref,
u hemm min jinbagħad għax ipaċpaċ ħafna.
6Hemm min iżomm sieket għax m’għandux xi jwieġeb,
u hemm min iżomm sieket għax jaf meta għandu jitkellem.
7Bniedem għaref iżomm sieket f’waqtu,
imma min hu mżattat u bla moħħ ma jqis xejn.
8Min jitkellem aktar milli jmissu jsiru jistmelluh,
u min jieħu f’idejh id-dritt li jitkellem isiru jobogħduh.
Paradossi9Jista’ jkun hemm riżq tajjeb fl-għawġ ta’ bniedem,
u f’xi rebħa jista’ jkun hemm telfien.
10Hemm għotja li ma tiswielek xejn,
u hemm għotja li ġġiblek id-doppju.
11Hemm nuqqas ta’ ġieħ ġej mill-glorja,
u hemm min għolla rasu mill-umiljazzjoni.
12Hemm min bi ftit jixtri ħafna,
u hemm min iħallas għal seba’ darbiet.
13L-għaref jitħabbeb bi kliemu,
imma ż-żegħil tal-iblah iwarrbuh.
14L-għotja ta’ min hu bla moħħ ma tiswielek xejn,
għax flok b’għajn waħda jara b’sebgħa.
15Jagħti ftit, imma jgħoddu b’ħafna,
u ħalqu jiftħu daqs min iħabbar;
illum jislef u għada jitlob lura.
Bniedem bħal dan mhux ta’ min jaħmlu.
16L-iblah jgħid: “M’għandix ħabib,
u l-ġid li nagħmel ma jafuhulix;
17dawk li jieklu ħobżi lsienhom ħażin.”
Kemm-il darba u kemm nies jiddieħku bih!
Kliem mhux floku18Aħjar tiżloq fl-art milli tiżloq b’ilsienek;
hekk il-waqgħa tal-ħżiena sseħħ bil-ħeffa.
19Bniedem bla grazzja hu bħal rakkont barra minn ħinu,
li qiegħed il-ħin kollu fuq fomm nies mingħajr manjieri.
20Qawl minn fomm iblah ma jintlaqax għax qatt ma jgħidu f’waqtu.
21Hemm min ma jidnibx għax jinsab fil-bżonn,
u fil-mistrieħ il-kuxjenza ma tniggżux.
22Hemm min jagħmel ħsara lilu nnifsu minħabba l-mistħija,
u jitlef ħajtu minħabba l-iblah.
23Hemm min jagħmel wegħda lil ħabib għax jistħi,
għal xejn b’xejn jagħmel għadu minnu.
Il-gideb24Gidba hi tebgħa kerha fuq bniedem,
u qiegħda l-ħin kollu fuq fomm nies bla manjieri.
25Aħjar tagħżel ħalliel minflok giddieb,
imma t-tnejn li huma jirtu t-telfien.
26Bniedem imdorri jigdeb jisfa bla ġieħ,
u l-għajb tiegħu jibqa’ miegħu.
Il-ġieħ u l-perikli tal-għaref27Min hu għaref fi kliemu jimxi ’l quddiem,
u bniedem għaqli jogħġob lill-kbarat.
28Min jaħdem l-art ikollu ħsad kbir,
u min jogħġob lill-kbarat jaħrab l-inġustizzja.
29Għotjiet u rigali jagħmu għajnejn l-għaref,
u bħal sarima mal-ħalq iżommuh lura miċ-ċanfir.
30Għerf moħbi, teżor ma jidhirx,
x’siwi għandhom it-tnejn li huma?
31Aqwa l-bniedem li jaħbi l-bluha tiegħu
minn wieħed li jaħbi għerfu.
Who We AreWhat We EelieveWhat We Do
2025 by iamachristian.org,Inc All rights reserved.
