GĦAMOS 6 - Maltese Bible with DC

Kapitlu 6Ix-xorti ta’ ġnus oħra

1Ħażin għalihom dawk li f’Sijon

għandhom moħħhom mistrieħ,

dawk li qalbhom qawwija fil-muntanja tas-Samarija,

il-kbarat tal-ewwel fost il-ġnus,

li għandhom jiġu n-nies ta’ Iżrael.

2Għaddu għal Kalni u taraw,

morru minn hemm għal Ħamat il-kbira,

u inżlu lejn Gatt tal-Filistin.

Jaqaw intom aħjar minn dawn is-saltniet?

Jonkella usa’ minn tagħhom il-fruntieri tagħkom?

3Mingħalihom ’il bogħod jum il-ħsara,

waqt li qegħdin iqarrbu l-ħakma tal-vjolenza.

4Fuq sodod tal-avorju mimduda,

jitmattru fuq il-friex;

u ħrief il-merħla jieklu,

għoġiela mill-istalla;

5mal-arpa jqabblu l-għana,

bħal David strumenti jivvintaw.

6L-inbid ilegilguh minn bwieqi kbar,

u bl-ifjen żjut jindilku,

bla xejn ma jsewdu qalbhom

għall-qerda ta’ Ġużeppi.

7Għalhekk ikunu l-ewwel fost dawk li jittieħdu fl-eżilju,

u tintemm imbagħad l-għajta tal-imhejmin.

8Ħalef il-Mulej bih innifsu,

oraklu tal-Mulej tal-eżerċti:

“Nistmerr jien il-kburija ta’ Ġakobb,

nobgħod il-fortizzi tiegħu.

Għalhekk il-belt se nitlaqha b’kulma fiha.”

9Għad jiġri li jekk f’dar waħda jifdal għaxra min-nies ħajjin,

dawn ukoll imutu.

10U meta qarib ta’ xi ħadd mejjet, dak li jaħarqu,

jiġbru biex iġorr għadmu ’l barra mid-dar,

u jgħid lil min ikun ġewwa fid-dar:

‘Hemm xi ħadd ieħor miegħek?’ u dak iwieġbu: ‘Le’, jgħidlu:

‘Iskot, għax m’għandniex insemmu isem il-Mulej.’

11Għaliex, ara, il-Mulej jikkmanda,

u jaħbat għad-dar il-kbira u jagħmilha frak,

u d-dar iż-żgħira laqx.

12Jaqaw iż-żwiemel jiġru fuq il-blat?

Jaqaw jaħartu l-baħar bil-baqar?

Intom biddiltu l-ġustizzja f’velenu,

u f’imrar il-frott tal-ġustizzja.

13Intom li fraħtu b’Lo-debar,

intom li għedtu:

“Jaqaw mhux b’ħilitna li rbaħna Karnajm?”

14“Arawni: Jien inqajjem kontrikom,

dar Iżrael, ġens u jgħakksukom

mill-mogħdija ta’ Ħamat

sal-wied tal-Għaraba,”

oraklu tal-Mulej, Alla tal-eżerċti.