1Koraħ bin Isħar, bin Keħat, bin Levi, u Datan u Abiram, ulied Elijab, u On bin Pelet, ulied Ruben, u magħhom kellhom mitejn u ħamsin ruħ oħra minn ulied Iżrael, mill-prinċpijiet tal-ġemgħa, li kienu jissejħu għal-laqgħat, kollha nies magħrufa.
3U nġabru kontra Mosè u Aron, u qalulhom: “Għandkom biżżejjed fuq spallejkom: Il-ġemgħa kollha huma kkonsagrati u f’nofshom hemm il-Mulej. Għaliex togħlew fuq il-ġemgħa tal-Mulej?”
4Kif sama’ dan Mosè ntafa’ wiċċu fl-art,
5u kellem lil Koraħ u ’l sħabu, u qalilhom: “Għada l-Mulej jgħarrafna min hu tiegħu, u min hu l-bniedem ikkonsagrat, li l-Mulej iridu ħdejh, u lil min ikun għażlu għalih iressqu lejh.
16U Mosè qal lil Koraħ: “Int u l-klikka tiegħek, ejjew għada quddiem il-Mulej ma’ Aron.
17Ħudu ċensier, wieħed kull wieħed, poġġu l-inċens, u ressqu quddiem il-Mulej il-mitejn u ħamsin ċensier, wieħed wieħed, int u Aron, kulħadd biċ-ċensier tiegħu.”
18U kull wieħed ħa ċ-ċensier tiegħu, poġġew in-nar fihom, u sawbu l-inċens, u qagħdu bilwieqfa quddiem it-tinda tal-laqgħa ma’ Mosè u Aron.
19U warajhom Koraħ ġabar il-ġemgħa kollha fi dħul it-tinda tal-laqgħa; u dehret il-glorja tal-Mulej quddiem il-ġemgħa kollha.
20U l-Mulej kellem lil Mosè u ’l Aron, u qalilhom:
21“Warrbu minn nofs din il-ġemgħa, ħa neqridhom ilkoll f’salt wieħed.”
22U ntefgħu għal wiċċhom fl-art u qalu: “Alla, Alla ta’ ruħ il-ħajjin kollha, bniedem wieħed biss dineb, u tagħdab int kontra l-ġemgħa kollha?”
23U l-Mulej kellem lil Mosè u qallu:
24“Kellem lill-ġemgħa u għidilhom: Warrbu minn madwar it-tined ta’ Koraħ, Datan u Abiram.”
25Mosè qam u mar lejn Datan u Abiram; u warajh marru l-anzjani ta’ Iżrael.
26Imbagħad kellem lill-ġemgħa u qalilhom: “Tbiegħdu mit-tined ta’ dawn in-nies ħżiena, u tmissu xejn minn tagħhom, biex ma tinbarmux fid-dnubiet tagħhom.”
27U tbiegħdu minn madwar it-tined ta’ Koraħ, Datan u Abiram: u Datan u Abiram ħarġu u qagħdu bilwieqfa fil-bieb tat-tined tagħhom bin-nisa u t-tfal u t-trabi tagħhom.
28U Mosè qal: “Issa minn dan tkunu tafu li l-Mulej bagħatni biex nagħmel kulma għamilt, u ma għamilt xejn minn rajja.
Who We AreWhat We EelieveWhat We Do
2025 by iamachristian.org,Inc All rights reserved.
