SALMI 103 - Maltese Bible with DC

Salm 103L-imħabba u l-ħniena ta’ Alla

1Ta’ David.

Bierek, ruħ tiegħi, il-Mulej!

B’qalbi kollha nbierek l-isem qaddis tiegħu.

2Bierek, ruħ tiegħi, il-Mulej,

u la tinsiex il-ġid kollu li għamel miegħek.

3Hu li jaħfer dnubietek kollha;

ifejjaq il-mard tiegħek kollu;

4jifdi lil ħajtek mill-qabar;

iħaddnek bit-tjieba u l-ħniena;

5ixabba’ bil-ġid snin ħajtek,

u bħal tal-ajkla tiġġedded żgħożitek.

6Il-Mulej jagħmel is-sewwa,

u l-ħaqq mal-maħqurin kollha.

7Hu għarraf lil Mosè l-ħsieb tiegħu,

l-għemejjel tiegħu lil ulied Iżrael.

8Ħanin u twajjeb il-Mulej,

idum ma jagħdab u kollu mogħdrija.

9Ma joqgħodx jitlewwem magħna,

u anqas jinkorla għal dejjem.

10Ma mexiex magħna skont ma ħaqqhom ħtijietna;

ma ħallasniex skont ma ħaqqha ħżunitna.

11Daqskemm huma s-smewwiet ’il fuq mill-art,

hekk hi kbira tjubitu ma’ min jibża’ minnu;

12daqs kemm hu mbiegħed il-Lvant mill-Punent,

hekk hu jbiegħed minna ħtijietna.

13Bħalma jħenn il-missier għal uliedu,

hekk iħenn il-Mulej għal min għandu l-biża’ tiegħu.

14Għax hu jaf kif aħna magħġuna,

jiftakar li aħna trab.

15Bħall-ħaxix il-ħajja tal-bniedem,

bħall-fjur tar-raba’, hekk jikber.

16Tgħaddi ż-żiffa minn fuqu, u jispiċċa,

u ħadd aktar ma jagħraf fejn kien.

17Imma t-tjieba tal-Mulej minn dejjem għal dejjem

ma’ dawk li għandhom il-biża’ tiegħu,

u s-sewwa tiegħu ma’ wlied uliedhom;

18ma’ dawk li jħarsu l-patt tiegħu,

u jiftakru fil-preċetti tiegħu u jħarsuhom.

19Waqqaf il-Mulej it-tron tiegħu fis-sema,

u saltnatu fuq kollox taħkem.

20Bierku l-Mulej, anġli tiegħu kollha,

setgħana u qawwija li tagħmlu l-ordni tiegħu,

malli tisimgħu leħen il-kelma tiegħu.

21Bierku l-Mulej, eżerċti tiegħu kollha,

qaddejja tiegħu, li tagħmlu r-rieda tiegħu.

22Bierku l-Mulej, għemejjel tiegħu kollha,

kullimkien fis-saltna tiegħu.

Bierek, ruħ tiegħi, il-Mulej!