ĠOB 8 - Maltese Bible with DC

Kapitlu 8Diskors ta’ Bildad: Alla ġust

1Qabeż jitkellem Bildad is-Suħi u qal:

2“Kemm se ddum titkellem hekk,

tvenven bħal riħ qawwi kliem fommok?

3Jista’ Alla jgħawweġ is-sewwa?

Jista’ Xaddaj imur kontra l-ġustizzja?

4Bilfors li dinbu kontrih uliedek,

biex hu raddilhom il-ħlas ta’ ħtijiethom.

5Issa jekk inti tfittex lil Alla

u tittallab il-ħniena ta’ Xaddaj,

6jekk safi int u sewwa għemilek

minn issa jdur favur tiegħek

u jroddlok id-dar li tistħoqq lilek.

7Ħaġa żgħira jkun il-ġid ta’ qabel

ħdejn il-kobor li għad ikollok.

8Staqsi biex tara lin-nisel ta’ qabilna,

u seddqu billi tistħarreġ għajdut ix-xjuħ.

9Għax aħna ġejna lbieraħ u xejn ma nafu,

bħal dell li jgħaddi ħajjitna fuq l-art.

10Mhux huma li jgħallmuk u jgħidulek

dan il-kliem ħiereġ minn qalbhom?

11‘Ma jikbirx il-papir barra mill-għadira,

lanqas jagħmel is-simar mingħajr l-ilma,

12ikun għadu jtalla’, mhux tal-qtugħ,

u jinxef qabel il-ħxejjex kollha.

13Hekk jiġrilu kull min jinsa ’l Alla,

it-tama ta’ min iwarrbu tinqered.

14Għax irqiqa sifja t-tama tiegħu,

għanqbuta l-fiduċja tiegħu.

15Iserraħ fuq daru iżda ma tiflaħx,

jaqbad magħha iżda ma żżommx.

16Iħaddar ġmielu għal għajn ix-xemx,

jifrex iż-żraġen mal-ġnien tiegħu,

17ixeblek ma’ munzell ġebel għeruqu,

u jieħu t-tira mill-blat.

18Xħin, imbagħad, jinqala’ minn postu

jiċħdu dan u jgħid: ‘Ma nafikx’.

19Dan hu, mela, it-tmiem ta’ ħajtu,

u mit-trab jinbtu oħrajn.’

20Le, Alla ma jwarrabx il-bniedem sewwa,

lanqas ma jwieżen lil min jagħmel id-dnewwa.

21Hu jerġa’ jimla bit-tbissima lil fommok,

u ’l xufftejk b’għajjat ta’ ferħ.

22Imbagħad jinksew bil-mistħija l-għedewwa tiegħek,

u l-għarix tal-ħżiena ma jkunx iżjed.”