SALMI 46 - Maltese Bible with DC

Salm 46Alla l-kenn u l-qawwa tagħna

1Għall-mexxej tal-kor. Ta’ wlied Koraħ. Fuq “Għalamôt”. Għanja.

2Kenn u qawwa hu Alla għalina,

għajnuna kbira sibnieh fid-dwejjaq.

3Għalhekk ma nibżgħux jekk l-art titriegħed,

jew jiġġarrfu l-muntanji f’nofs ta’ baħar;

4anqas jekk jgħajtu u jogħlew ilmijietu,

jew jitheżżu l-muntanji bit-tqanqil tiegħu.

Il-Mulej tal-eżerċti magħna,

fortizza għalina Alla ta’ Ġakobb!

5Hemm xmara li s-swieqi tagħha

iferrħu l-belt ta’ Alla,

l-għamara qaddisa tal-Għoli.

6Hemm Alla f’nofsha, ma titħarrikx;

jgħinha Alla mat-tbexbix tas-sebħ.

7Triegħdu l-ġnus, iġġarrfu s-saltniet,

iddewbet l-art, malli samma’ leħnu.

8Il-Mulej tal-eżerċti magħna,

fortizza għalina Alla ta’ Ġakobb!

9Ejjew, araw x’għamel il-Mulej,

għemejjel tal-għaġeb fuq l-art.

10Iwaqqaf il-gwerer sa tarf l-art;

l-ark jaqsam u l-lanza jkisser,

jaħraq it-tarki bin-nar, u jgħid:

11“Biżżejjed! Kunu afu li jien Alla,

għoli fuq il-ġnus, għoli fuq l-art!”

12Il-Mulej tal-eżerċti magħna,

fortizza għalina Alla ta’ Ġakobb!