ISAIJA 57 - Maltese Bible with DC

Kapitlu 57

1Il-ġust jinqered,

imma ħadd ma jħoss għalih.

In-nies twajba jinġabru,

iżda ħadd ma jagħti kas.

Iva, il-ġust jinġabar minħabba l-ħażen;

2jidħol fis-sliem,

jistrieħu fuq friexu kull min jimxi dritt.

Il-kulti moqżieża tal-fertilità

3“Imma intom, ulied is-saħħara, ersqu ’l hawn,

nisel l-adultera u l-prostituta.

4B’min qegħdin tiddieħku?

Kontra min qegħdin tfettħu ħalqkom,

u toħorġu lsienkom?

Jaqaw m’intomx ulied id-dnub,

ulied il-qerq?

5Intom tmorru b’demmkom ibaqbaq taħt il-ballut;

taħt kull siġra tħaddar;

toqtlu t-trabi fil-widien,

fi xquq l-irdumijiet.

6Fil-ġebel lixx tal-wied sehmek;

dan, dan xortik.

Lilhom sawwabt il-libazzjonijiet,

ġibt l-offerta tas-sagrifiċċju.

Nista’ jien noqgħod bi kwieti b’dan?

7Fuq muntanja għolja u wieqfa,

int poġġejt friexek,

u hemm fuq tlajt toffri s-sagrifiċċju.

8U wara l-bieb u l-koxox tiegħu,

l-arma tiegħek dendilt.

U mbiegħda minni xaqlibt il-friex u tlajt;

wassajt soddtok u ftehemt magħhom,

ma’ dawk li ħabbejt friexhom,

u lejn għerithom ħarist ċassa.

9Ersaqt lejn alla Molek biż-żejt midluka,

u żidt il-fwejjaħ tiegħek.

Bgħatt ’il bogħod il-messaġġiera tiegħek,

sa tbaxxejt sal-Art l-Imwiet.

10Minkejja li nkeddejt bl-imġiba tiegħek,

qatt ma għedt: “Qtajt qalbi!”

Sibt il-qawwa għal ħajtek,

għalhekk qatt ma nfnejt.

11Minn min twerwirt u bżajt,

biex tħassart daqshekk,

biex anqas fija biss ma ftakart,

u anqas biss ma ħsibt?

Mhux għax jiena bqajt sieket u għalaqt għajnejja

li inti bżajt minni?”

12Jien għad inxandar is-sewwa tiegħek u għemilek,

imma dawn xejn ma jiswewlek.

13Ħa jsalvawk l-idoli miġmugħa tiegħek,

meta ssejħilhom.

Ir-riħ għad itajjarhom

u ż-żiffa ġġorrhom.

Imma min jitma fija jiret l-art,

u jiret il-muntanja mqaddsa tiegħi.

14U għad jgħid:

“Iftħu, iftħu t-triq, wittuha!

Neħħu t-tfixkil minn triq il-poplu tiegħi!”

15Għax dan jgħid min qiegħed merfugħ fl-għoli,

li jgħix għal dejjem u qaddis ismu:

“Jien ngħammar fl-għoli u f’post qaddis,

imma l-istess jien qiegħed mal-bniedem

b’qalb maqsuma u umiljat f’ruħu;

biex naħji r-ruħ umiljata,

inqawwi l-qalb miksura.

16Għax ma nitlewwimx għal dejjem,

u lanqas ma ninkorla għalkollox;

għax kieku tinfena r-ruħ quddiemi,

u nifs il-ħajja li jiena ħlaqt.

17Minħabba ħżunitu għal ftit għadabt,

u sawwattu u nħbejt inkurlat,

imma xorta waħda baqa’ miexi għal rajh fit-triq ta’ qalbu.

18Jiena rajt triqatu, u rrid infejqu,

immexxih u nroddlu l-faraġ,

u lil dawk li jibkuh,

noħolqilhom kelma frott ix-xufftejn:

19Sliem, sliem, lil kulħadd, fil-bogħod u fil-qrib,

jgħid il-Mulej, infejjaqhom ilkoll.

20Imma l-ħżiena bħal baħar imqanqal,

li ma jista’ jsib kwiet b’xejn,

u ilmijietu jqanqlu ħama u tajn.

21M’hemmx sliem għall-ħżiena,”

jgħid Alla tiegħi.