1L-għawġ ma jiġix fuq min jibża’ mill-Mulej,
u f’kull tiġrib jeħilsu għal darba tnejn.
2Bniedem għaqli ma jobgħodx il-Liġi,
u min juri wiċċ b’ieħor fil-ħarsien tagħha qisu dgħajsa fil-maltemp.
3Min jifhem jafda fil-Liġi,
u joqgħod fuqha daqs kelmet oraklu.
4Ħejji dak li għandek tgħid, u hekk tkun mismugħ,
iġbor flimkien dak li tgħallimt, u mbagħad agħti tweġiba.
5Bħal rota ta’ karettun qalb l-iblah;
u ħsibijietu bħal rota ddur.
6Żiemel għar-razza l-ħabib tad-daħk;
jiżher taħt kull min jirkeb fuqu.
Ħaġa mhix bħal oħra7Għaliex jum hu aħjar minn ieħor
meta d-dawl ta’ kull jum is-sena kollha ġej mix-xemx?
8Bl-għerf tiegħu l-Mulej għażel wieħed minn ieħor
u qassam iż-żminijiet u l-festi.
9Uħud minnhom għolliehom fuq l-oħrajn u qaddishom,
u wħud minnhom għamilhom jiem tas-soltu.
10U l-bnedmin kollha ġejjin mit-trab,
u Adam kien maħluq mill-art.
11Fil-milja ta’ għerfu l-Mulej għażel wieħed minn ieħor,
u għamel li triqathom ma jkunux jixxiebhu.
12Uħud minnhom berikhom u għolliehom,
uħud minnhom qaddishom u ressaqhom lejh;
imma wħud minnhom seħethom u tefagħhom ’l isfel,
u warrabhom minn fejn kienu.
13Bħal tafal f’idejn il-fuħħari,
- kollox jagħmel skont ma jogħġob lilu -
hekk il-bnedmin f’idejn min għamilhom:
jagħtihom skont kif jaqtagħha hu.
14Kontra l-ħażin hemm it-tajjeb,
u kontra l-mewt hemm il-ħajja,
kontra l-midneb hemm il-bniedem sewwa.
15Hekk ukoll jekk tħares lejn l-għemejjel kollha tal-Għoli;
qegħdin tnejn tnejn, wieħed kontra l-ieħor.
16U jien l-aħħar wieħed li bqajt nishar,
bħal min ilaqqat il-fdal wara ġbir il-għeneb.
17Bil-barka tal-Mulej ġejt ’il quddiem,
bħal min jiġbor l-għeneb u jimla l-magħsar.
18Araw li mhux għalija biss tħabatt,
imma għal dawk kollha li jfittxu t-tagħlim.
19Isimgħu minni, kbarat tal-poplu;
mexxejja tal-ġemgħa, agħtuni widen.
Mingħajr xkiel20Lil ibnek u ’l martek, lil ħuk u ’l ħabibek,
tul ħajtek tagħtihomx setgħa fuqek.
Il-ġid li għandek tagħtihx lil ħaddieħor,
biex ma jisgħobx bik u titlobhulu lura.
21Sakemm għadek ħaj u qed tieħu n-nifs,
tintreħa f’idejn l-ebda bniedem.
22Għax aħjar li wliedek jitolbu lilek,
milli int tistenna xi ħaġa minn idejn uliedek.
23Kun mill-aħjar f’kulma tagħmel,
u ttebbax ġieħek.
24Dakinhar li jaslu fit-tmiem jiem ħajtek,
meta tkun wasalt fl-aħħar, qassam wirtek.
L-ilsiera25Għalf, bastun, u tagħbija għall-ħmar,
ħobż, dixxiplina, u xogħol għall-qaddej tiegħek.
26Qabbad il-qaddej tiegħek jaħdem, u ssib il-mistrieħ,
ħallih b’idejh qiegħda, u jfittex il-ħelsien.
27Madmad u riedni jgħawġu l-għonq,
xkiel u frosta għall-qaddej ħażin.
28Itfgħu għax-xogħol biex ma jitgħażżinx,
għax l-għażż jgħallem il-ħażen kollu.
29Qiegħdu fuq xogħol bħalma jistħoqqlu,
u jekk ma jobdix xekkillu riġlejh.
30Imma lil ħadd m’għandek tgħabbi żżejjed,
u tagħmel xejn mingħajr ma taħsibha.
31Jekk għandek qaddej, għandu jkun bħalek,
għaliex inti ksibtu bil-prezz ta’ demmek.
32Jekk għandek qaddej, żommu bħal ħuk,
għax teħtieġu daqsek innifsek.
33Jekk iġġib ruħek ħażin miegħu u jitilqek u jaħrab,
fejn taqbad tfittxu?
Who We AreWhat We EelieveWhat We Do
2025 by iamachristian.org,Inc All rights reserved.
