1Jien dan kollu qistu u fhimtu tajjeb, li l-ġusti u l-għorrief bl-għemejjel tagħhom kollha huma f’idejn Alla; jekk hux imħabba jew mibegħda ma jafux x’ħaqqhom. It-tnejn huma quddiemhom!; u biex tkompli tagħqad, qalb il-bniedem mimlija ħażen, u l-bluha tul għomorhom kollu tgħammar fihom, biex imbagħad imorru mal-mejtin.
4Min għadu msieħeb mal-ħajjin fadallu tama: għax “aħjar kelb ħaj minn iljun mejjet”.
5Il-ħajjin, għallinqas, jafu li għad imutu, iżda l-mejtin ma jafu xejn; lanqas ħlas ma baqa’ għalihom għax imqar it-tifkira tagħhom intesiet.
8Ħa jkunu f’kull żmien bojod ilbiesek,
qis li l-fwieħa fuq rasek ma tonqosx.
9Gawdi l-ħajja ma’ martek l-għażiża,
il-jiem kollha ta’ ħajtek fiergħa,
li Alla silfek taħt ix-xemx,
għax dan hu sehmek mill-ħajja u mit-taħbit
li inti ġġarrab taħt ix-xemx.
10Kulma ssib x’tagħmel, agħmlu b’ħiltek kollha għax ma jkunx hemm ħidma jew ħsieb, xjenza jew għerf, f’Art l-Imwiet fejn inti sejjer.
11Rajt ukoll taħt ix-xemx li ma tintrebaħx mill-ħfief it-tiġrija, lanqas mill-felħana t-taqbida. Mhuwiex tal-għorrief il-ħobż jew ta’ min jifhem il-ġid; lanqas ta’ min jinqala’ s-suċċess, iżda f’kollox jidħol iż-żmien u ċ-ċirkustanzi.
12Il-bniedem ma jafx xħin tasal sigħetu: bħall-ħut li jidħol f’xibka qarrieqa, bħat-tajr li jinqabad fix-xbiek, hekk jinqabdu l-bnedmin minn siegħa ħażina xħin tiġi fuqhom għal għarrieda.
13Rajt ukoll taħt ix-xemx dan il-każ li laqatni ħafna.
14Kien hemm belt żgħira bi ftit nies jgħammru fiha u sultan kbir mar jaħbat għaliha. Dawwarha b’assedju u talla’ madwarha torrijiet għolja.
15Mela jkun hemm fiha raġel fqir iżda għaref, u bil-ħila ta’ moħħu rnexxielu jeħles il-belt; b’danakollu ħadd ma baqa’ jiftakru ’l dak il-fqir.
16Imbagħad jien għedt:
“Tassew li l-għerf aħjar mis-saħħa;
b’danakollu l-għerf tal-fqir jistmerruh
u għal kliemu ma jagħtux widen.
17Jinstama’ aħjar kliem l-għorrief imlissen bil-kalma,
mill-ħafna għajjat ta’ kmandant fost il-boloh.
18Aħjar l-għerf mill-armi tal-gwerra,
iżda żball wieħed jista’ jgħarraq ġid kbir.
Who We AreWhat We EelieveWhat We Do
2025 by iamachristian.org,Inc All rights reserved.
