HOSEGĦA 10 - Maltese Bible with DC

Kapitlu 10Il-qerda tal-idolatrija

1Iżrael dielja kollha friegħi,

tagħmel ħafna frott.

Aktar ma kellu frott,

aktar bena artali.

Aktar ma kienet tagħti l-art,

aktar sebbaħ il-plieri sagri.

2Qalbhom mifruda fiha nfisha,

u issa jkollhom ipattu.

Hu Alla li se jkissrilhom l-artali,

u jfarrkilhom il-plieri sagri tagħhom.

3Għax issa huma jgħidu:

“M’hemmx sultan għalina.

Aħna ma nibżgħux mill-Mulej.

X’jista’ jagħmlilna s-sultan?”

4Kollhom tpaċpiċ,

jiffirmaw ftehim bil-ħalf fil-vojt;

u l-ġustizzja tinbet bħal ħaxix morr

fir-raddi tar-raba’.

5Għall-għoġol ta’ Bet-awen

jitkexkxu n-nies ta’ Samarija;

għax għad jibki l-poplu tiegħu,

u jitniehdu l-qassisin tiegħu

għax għab minnu ġmielu.

6Lilu wkoll jeħduh fl-Assirja,

bħal offerta lis-sultan il-kbir.

Efrajm jaqa’ fl-għajb,

u Iżrael jistħi minn fehmietu.

7Intemmet Samarija;

is-sultan tagħha bħal laqxa f’wiċċ l-ilma.

8Jiġġarrfu s-santwarji

fuq l-għoljiet tal-ħażen,

id-dnub ta’ Iżrael;

xewk u għollieq għad jinbet

fuq l-artali tagħhom.

Għad jgħidu lill-muntanji: “Għattuna”

u lill-għoljiet: “Ordmuna”.

9Sa minn żmien Gibgħa dnibt, o Iżrael!

Hemm baqgħu f’dak il-ħażen.

Ma laħqithomx il-gwerra f’Gibgħa,

10minħabba wlied il-ħażen?

Jien niġi u nikkastigahom.

Jinġemgħu kontrihom il-ġnus,

biex jikkastigawhom għaż-żewġ dnubiet.

11Efrajm kien għoġla mħarrġa,

tħobb id-dris.

Imma jiena għabbejt madmad

fuq għonqha s-sabiħ,

u rbatt lil Efrajm għall-ħrit.

Ġuda għad jaħrat, u Ġakobb ixattab.

12Iżirgħu għalikom il-ġustizzja,

u taħsdu l-frott tat-tjieba.

Agħżqu l-art mistrieħa,

għax wasal żmien li tfittxu l-Mulej.

Sakemm jiġi u jibgħat

ix-xita tas-sewwa fuqkom.

13Imma intom żrajtu l-ħażen,

u ħsadtu l-għawġ,

u jkollkom tieklu frott il-gideb,

għax int fdajt fl-imriekeb tiegħek,

fil-kotra tal-qalbenin tiegħek.

14Tqum għagħa fost il-poplu tiegħek,

u l-fortizzi tiegħek isiru ħerba,

bħalma Salman qered lil Bet-arbel,

f’jum it-taqtigħa,

meta l-omm kienet misħuqa ma’ wliedha.

15Hekk nagħmlilkom, dar Iżrael,

minħabba kobor ħżunitek.

Mas-sebħ jinqered is-sultan ta’ Iżrael.