ĠEREMIJA 48 - Maltese Bible with DC

Kapitlu 48Oraklu għal Mowab

1Għal Mowab: dan jgħid il-Mulej tal-eżerċti, Alla ta’ Iżrael:

“Gwaj għal Nebu, saret ħerba,

waqgħet fl-għajb, inqabdet Kirjatajm;

imgħajba u mirbuħa l-fortizza.

2Ma għadhiex aktar il-foħrija ta’ Mowab,

f’Ħesbon ifasslu l-ħażen kontrih:

“Ejjew ħa neqirduh minn fost il-ġnus.’

U int ukoll, Madmèn, għad isikktuk;

għal warajk għad tiġri x-xabla.

3Isma’ l-għajjat minn Ħoronajm!

Ħerba u tkissir bil-kbir!

4Tfarrak Mowab,

l-għajjat jinstama’ sa minn Segor.

5Għax it-telgħa ta’ Luħit

imbikkija jitilgħuha.

Għax fin-niżla ta’ Ħoronajm

jisimgħu l-għajta tal-qerda.

6Aħarbu! Salvaw ħajjitkom,

kunu bħal ħmar selvaġġ fix-xagħri.

7Għax int qegħedt it-tama tiegħek

fix-xogħol ta’jdejk u t-teżori tiegħek,

int ukoll għad jaqbduk.

U Kemos jitlaq għall-eżilju

bil-qassisin u l-prinċpijiet tiegħu.

8U l-qerried jilħaq ’il kull belt,

u ebda belt ma teħlisha;

jitħarbat il-wied,

tinqered il-wita,

bħalma qal il-Mulej.

9Agħti l-ġwienaħ lil Mowab ħalli jtir,

għax blietu jsiru ħerba,

u ħadd aktar ma jgħammar fihom.

10Misħut il-bniedem li jagħmel xogħol il-Mulej b’nofs kedda;

u misħut hu min iżomm ix-xabla ’l bogħod mid-demm.

11Mowab kien bi kwietu sa minn żgħożitu,

u mistrieħ fil-bittija

u qatt ma tferragħ minn ġarra għal ġarra,

u fl-eżilju qatt ma mar.

Għalhekk dejjem baqgħetlu t-togħma tiegħu,

u r-riħa tiegħu qatt ma nbidlet.

12Għalhekk arahom ġejjin jiem,

oraklu tal-Mulej,

meta nibgħat nies li jqallbu l-ġarar,

u jqallbuh, u jferrgħu l-ġarar kollha tiegħu,

u jitħnu l-qolol tagħhom.

13U Mowab għad jistħi minn Kemos bħalma stħaw dar Iżrael

minn Betel, it-tama tagħhom.

14Kif tistgħu tgħidu:

‘Qalbiena aħna u rġiel ta’ ħila għall-ġlied’?

15Il-qerried ta’ Mowab u blietu tela’,

u l-aħjar taż-żgħażagħ tiegħu niżlu għall-qatla,

oraklu tas-Sultan,

Jaħweh tal-eżerċti ismu.

16Għoddha waslet il-qerda ta’ Mowab,

ġejja bl-għaġla l-ħsara tiegħu.

17Ibkuh intom ilkoll ġirien madwaru,

u intom li tafu b’ismu u għidu:

‘Kif tkisser ix-xettru setgħan,

ix-xettru glorjuż!”

18Inżel mill-glorja tiegħek,

oqgħod fuq l-art niexfa,

int li tgħammar f’Dibon,

għax il-qerried ta’ Mowab tela’ għalik,

ħa jġarraf il-fortizzi tiegħek.

19Oħroġ fit-triq u ħares,

int li tgħammar f’Għarogħer.

Stħarreġ il-maħrub u l-meħlus;

staqsieh: ‘X’inhu li ġara?’

20Mowab waqqgħuh fl-għajb,

għax tfarrak.

Ixhru u għajtu,

xandruha ma’ xtut l-Arnon

li tkisser Mowab.

21Wasal il-ħaqq fuq art il-wita;

fuq Ħolon u fuq Ġaħsa, u fuq Mefagħat,

22fuq Dibon u fuq Nebu,

u fuq Bet-diblatajm;

23fuq Kirjatajm, u fuq Bet-gamul,

u fuq Bel-megħon;

24fuq Kirjot u fuq Bosra,

u fuq kull belt ta’ art Mowab,

tal-qrib u tal-bogħod.

25Il-qawwa ta’ Mowab tfarrket

u driegħu tkisser,

oraklu tal-Mulej.

26Sakkruh għax tkabbar quddiem il-Mulej;

ħa jitmiegħek fit-taqligħ tiegħu,

ħa jaqa’ għaż-żufjett.

27Ma waqqajtx lil Iżrael għaż-żufjett?

Kien jaqaw maqbud fost il-ħallelin,

biex kull meta kont titkellem fuqu,

ixxejjer rasek?

28Ħallu l-ibliet

u morru għammru fil-blat,

intom li tgħammru f’Mowab.

Kunu bħall-ħamiema,

li tbejjet f’xifer l-irdum.

29Smajna bil-kburija ta’ Mowab,

imkabbar bil-bosta:

kemm tgħolla, tkabbar u żżarġan!

Kemm intefħet qalbu!

30Jien naf tajjeb kburitu,

oraklu tal-Mulej,

bi ftaħiru fil-vojt,

b’għemilu fieragħ.

31Għalhekk jien nixher għal Mowab,

għal Mowab kollu ngħajjat,

għan-nies ta’ Kir-ħeres jien nibki.

32Nibkik aktar minn Ġagħżer,

ja dielja ta’ Sibma!

Feragħtek waslu ’l hemm mill-baħar,

laħqu sa Ġagħżer.

Fuq il-frott u l-ġabra tal-għeneb tiegħek

se jinxteħet il-qerried.

33Għelbu l-ferħ u l-hena,

mill-art għammiela ta’ Mowab.

Jien nixxift l-inbid mill-magħsar,

l-għassar ma jagħsarx aktar;

l-għana ferrieħ m’għadux għana ta’ ferħ.

34L-għajjat ta’ Ħesbon jasal sa Elgħali,

sa Ġaħas tasal l-għajta tagħhom,

minn Sogħar jinstama’ l-għajjat tagħhom,

sa Ħoronajm u Għeglat-selisija,

saħansitra l-ilmijiet ta’ Nimrin nixfu.

35Jiena ntemm minn Mowab,

oraklu tal-Mulej,

lil min joffri s-sagrifiċċji fuq l-għoljiet,

u jaħraq l-inċens lill-allat tiegħu.

36Għalhekk qalbi tokrob bħall-flawt għal Mowab;

tingħi qalbi bħall-flawt

għan-nies ta’ Kir-ħeres;

għax il-qligħ li għamlu mar fix-xejn.

37Kull ras tqarwżet, kull leħja tqaxxret;

u idejhom kollha mqattgħin,

u l-ġenbejn miksija bix-xkora.

38Fuq il-bjut kollha ta’ Mowab,

u fil-pjazez kollha,

kullimkien biki,

għax jien kissirt ’il Mowab bħal ġarra li ma togħġobnix,

oraklu tal-Mulej.

39“Kif tfarrak! Xi jwerżqu!

Kif dawwar dahru Mowab kollu għajb;

Mowab waqa’ għaż-żufjett,

u sar waħx u twerwir għall-ġirien madwaru.

40Għax dan jgħid il-Mulej:

“Araw, bħal ajkla jittajjar,

u jifrex ġwenħajh għal fuq Mowab.

41Jinqabdu l-ibliet,

jintrebħu l-fortizzi.

F’dak il-jum qalb il-qalbiena ta’ Mowab,

tkun bħal qalb mara fil-ħlas.

42Ma jibqax poplu Mowab, jinqered,

għax tkabbar kontra l-Mulej.

43Għalik li tgħammar f’Mowab

m’hemmx ħlief biża’, ħofra u nassa,

oraklu tal-Mulej.

44Min jaħrab mill-biża’

jaqa’ fil-ħofra;

u min jitla’ mill-ħofra

jinqabad fin-nassa.

Jien inġib dan kollu fuq Mowab

fis-sena ta’ kastighom,

oraklu tal-Mulej.

45Għad-dell ta’ Ħesbon jistrieħu

bla saħħa l-maħrubin;

imma nar joħroġ minn Ħesbon,

u ilsna tan-nar mill-palazz ta’ Siħon,

u jibilgħu ġbin Mowab

u l-qorriegħa tan-nies imkabbra.

46Gwaj għalik Mowab,

intemm il-poplu ta’ Kemos,

għax is-subien tiegħek ittieħdu fil-jasar,

u bnietek fl-eżilju.

47Imma jien inbiddel ix-xorti ta’ Mowab,

fl-aħħar jiem,”

oraklu tal-Mulej.

Sa hawn il-ġudizzju fuq Mowab.