ĠOB 31 - Maltese Bible with DC

Kapitlu 31

1“Għamilt patt ma’ għajnejja

li fuq xebba ma nixħethomx.

2U x’inhu s-sehem li qassam Alla mill-għoli?

X’wirt ħejja Xaddaj mis-smewwiet?

3Mhux il-ħsara għall-midneb

u l-iżventura għall-ħżiena?

4Iżda ma jarax Alla l-imġiba tiegħi?

Ma jgħoddlix il-passi kollha tiegħi?

5Qatt imxejt jien bil-gideb?

Qatt ħaffift il-pass lejn il-qerq?

6Ħa jiżinni Alla b’miżien tajjeb,

u jagħraf il-ħajja bla tebgħa tiegħi.

7Jekk ilwejt mit-triq id-dritta,

u qalbi strieħet wara t-tħajjir t’għajnejja,

jew weħlet xi tebgħa ma’ jdejja,

8ħa niżra’ jien u l-frott jieħdu ħaddieħor,

u dak li jinbitli jinqala’ mill-għeruq.

9Jekk issaħħret qalbi wara mara oħra,

u ssajjajt għaliha wara bieb għajri,

10ħa titħan marti għal ħaddieħor,

u jmilu fuqha rġiel oħrajn.

11Għax dan hu għamil faħxi,

dnub li jiġġudikawh l-imħallfin.

12Hu nar li jaħraq sat-Telfien,

u jeqridli ġidi kollu.

13Qatt ċħadt il-jedd lill-qaddej tiegħi,

jew lill-qaddejja xħin tlewmu miegħi?

14Le, għax x’kont nagħmel li kellu jqum Alla?

X’kont inwieġeb li kien jiġi jistħarriġni?

15Min għamel lili fil-ġuf, ma għamilx ukoll lilu?

Mhux l-istess wieħed sawwarna fi ħdan ommijietna?

16Qatt ċħadt jien lill-foqra dak li xtaqu?

Ħallejt jien għajnejn armla jinfnew?

17Qatt kiltu waħdi l-bukkun tiegħi?

Ma kielx ukoll minnu l-iltim,

18li minn ċkunitu rabbejt bħal missier,

u mexxejtu sa minn ġuf ommu?

19Jekk rajt xi msejken mifni bl-għera,

jew xi fqir li ma kellux għata,

20u ma berkunix ġenbejh,

jew ma ssaħħanx bis-suf tan-nagħaġ tiegħi;

21jekk erfajt idi kontra l-innoċenti,

għax kelli fil-qorti min jaqbeż għalija,

22ħa tinqala’ spallti minn ġo għonqi,

u driegħi jinkiser mill-minkeb.

23Għax kont nibża’ mill-kastig ta’ Alla,

u ma niflaħx għall-kobor ta’ sebħu.

24Qatt għedt lid-deheb: ‘Inti t-tama tiegħi,’

jew lid-deheb fin: ‘Bik mistrieħa rasi’?

25Fraħt xi darba bil-kotra ta’ ġidi,

jew bil-qligħ kbir li kisbuli jdejja?

26Jekk rajt ix-xemx tiddi,

u l-qamar tiela’ bi ġmielu,

27tgħawwiet forsi qalbi bis-serqa,

u tajthom bewsa b’idi ma’ fommi?

28Mhuwiex delitt li jiġġudikawh l-imħallfin,

talli nkun ċħadt ’l Alla li jsaltan fl-għoli?

29Ħadt xi gost bid-deni tal-għadu tiegħi,

inkella fraħt meta laqtitu l-ħsara?

30Le, anqas ilsieni ma ħallejt jidneb

b’xi talba ta’ saħta fuq ħajtu.

31Qatt qalu n-nies ta’ dari:

‘Mhux li konna nixbgħu mill-mejda tiegħu?’

32L-ebda frustier ma ħallejt jgħaddi l-lejl barra,

dari ftaħtha lill-vjaġġatur.

33Qatt ħbejt bħal Adam dnubi,

jew sarrejt fi ħdani ħtijieti,

34jew bqajt sieket magħluq ġewwa dari,

għalkemm l-għagħa tal-kotra kienet tbeżżagħni,

u jkexkixni t-tmaqdir tat-tribù?

35Mhux li kien jisma’ xi ħadd il-kawża tiegħi!

Hawn hi l-firma tiegħi! Ħa jweġibni Xaddaj!

36M’hux li kelli l-att tal-akkuża ta’ min xlieni!

Fuq spallti kont inġorru,

jew ma’ rasi ndawru bħal kuruna.

37Kont ngħoddlu wieħed wieħed il-passi tiegħi,

kont nersaq lejh bħal wieħed kbir.

38Jekk għajjat kontrija r-raba’ tiegħi,

u bkew flimkien ir-raddi tiegħu,

39għax kilt bla ħlas mill-frott tiegħu,

u dawk li ħadmuh fnejtilhom ruħhom,

40flok qamħ jinbitli x-xewk,

flok xgħir ħaxix ħażin.”

Tmiem id-diskors ta’ Ġob.