HOSEGĦA 11 - Maltese Bible with DC

Kapitlu 11Il-ħniena ta’ Alla ma tonqos qatt

1“Meta kien tfajjel Iżrael ħabbejtu,

u mill-Eġittu sejjaħt lil ibni.

2Imma aktar ma sejjaħtilhom,

aktar tbiegħdu minni;

offrew sagrifiċċji lil Bagħalim,

u baħħru quddiem l-idoli.

3Kont jien li ’l Efrajm għallimtu jimxi,

erfajthom fuq dirgħajja,

iżd’huma m’għarfux kemm kont ħadt ħsiebhom!

4Bi ħbula ta’ bnedmin jien ġbidthom,

b’rabtiet ta’ mħabba;

u kont għalihom bħal min jerfa’ tarbija ma’ ħaddejh,

u lejha mmil nitmagħha.

5Ikollhom jerġgħu lura lejn l-Eġittu,

l-Assirja ssaltan fuqhom,

għax ma ridux jerġgħu lura lejja.

6Is-sejf jgħaddi bil-qilla mill-ibliet tagħhom,

u jeqred lil uliedhom,

u jagħmel ħerba mill-fortizzi tagħhom.

7Il-poplu mġarrab għax tbiegħed minni:

isejħu ’l Bagħal, u ma jweġibhomx.

8Kif! Jien se nwarrbek minni, Efrajm?

Iżrael, se nerħik?

Kif! Jien se nwarrab lilek minni bħal Adma,

nagħmlek bħal Sebojim?

Daret għalija qalbi, tqanqlet bil-bosta ħnienti.

9Le, ma nħaddimx il-korla mħeġġa tiegħi;

le, ma nerġax inġib fix-xejn ’l Efrajm,

għax Alla jien, u mhux bniedem,

jien f’nofsok il-Qaddis;

jien ma niġix biex neqred.

10Għax jimxu wara l-Mulej,

li bħal iljun jgħajjat; jgħajjat

u wliedu jiġu jiġru mill-Punent;

11iħaffu mill-Eġittu bħal għasfur,

u bħal ħamiema jgħaġġlu minn art l-Assirja;

u jagħtihom li jgħammru fi djarhom,”

oraklu tal-Mulej.