SALMI 35 - Maltese Bible with DC

Salm 35Talba tal-ġust ippersegwitat

1Ta’ David.

Ħudha, Mulej, ma’ min jeħodha miegħi,

tqabad ma’ min jitqabad kontrija.

2Aqbad it-tarka, il-kbira u ż-żgħira,

u qum biex tagħtini l-għajnuna.

3Xejjer il-lanza u islet is-sejf

għal dawk li jagħmlu għalija.

Għidli: “Jiena s-salvazzjoni tiegħek!”

4Jitfixklu u jistħu

dawk li jfittxu jneħħuli ħajti.

Jerġgħu lura mifxula

dawk li ħsiebhom kif jagħmluli l-ħsara.

5Ħa jkunu bħal karfa mar-riħ,

imkeċċija mill-anġlu tal-Mulej.

6Tkun triqithom dlam u żliq;

u l-anġlu tal-Mulej isuqhom.

7Għal xejn b’xejn nasbuli xibka,

għal xejn ħaffruli ħofra.

8Tiġi fuqhom qerda għal għarrieda,

taħkimhom ix-xibka li nasbu,

jaqgħu fil-ħofra li ħaffru.

9Imma jien fil-Mulej nifraħ,

nitgħaxxaq bis-salvazzjoni tiegħu.

10Saħansitra għadmi kollu jgħid:

“Min hu bħalek, Mulej!

Int teħles l-imsejken minn min hu aqwa minnu,

l-imsejken u l-fqajjar minn dawk li jisirquh.”

11Iqumu xhieda qarrieqa,

jistaqsuni dak li ma nafx;

12bid-deni għall-ġid iħallsuni;

qerduli ruħi.

13Iżda meta huma kienu morda,

jien kont nilbes l-ixkora;

kont ngħakkes bis-sawm lili nnifsi,

u nitlob b’rasi mgħaddsa fi ħdani.

14Bħal ħbiebi, bħal ħuti mxejt magħhom;

bħal min jagħli għal ommu nxtħett fin-niket.

15Meta wqajt jien, inġemgħu flimkien jifirħu,

ingħaqdu flimkien kontrija.

Bla ma naf għaliex jaħbtu għalija,

bla heda jtertquni.

16Mal-ħżiena jkasbruni u jiddieħku bija,

jgħażgħżu snienhom kontrija.

17Int, Mulej Sidi, kemm se ddum tħares?

Eħlisni mill-qerda tagħhom,

eħlisli mill-iljuni ħajti l-għażiża.

18Niżżik ħajr qalb ġemgħa kbira,

qalb kotra ta’ nies infaħħrek.

19Tħallix l-għedewwa qarrieqa

jithennew minħabba fija;

anqas ’il dawk li għal xejn jobogħduni

jegħmżu ’l xulxin kontrija.

20Għax huma ma jitkellmux bis-sliem;

imqar kontra nies kwieti

kliem ta’ qerq jaqilgħu.

21Ħalqhom jiftħu beraħ fuqi:

“Arah!”, jgħidu ferħana. “Hawn hu taħt għajnejna!”

22Int rajtu dan, Mulej; la tibqax sieket;

Sidi, titbegħidx minni.

23Stenbaħ u qum biex tagħtini raġun,

biex taqbeż għall-kawża tiegħi,

Alla tiegħi u Sid tiegħi.

24Skont il-ġustizzja tiegħek agħtini li ħaqqni,

Mulej, Alla tiegħi;

tħallihomx jifirħu minħabba fija.

25Ħalli ma jgħidux f’qalbhom: “Qtajna xewqitna!”

Ħalli ma jgħidux: “Ġibnieh fix-xejn.”

26Ħa jistħu u jinfixlu lkoll flimkien

dawk li jifirħu bid-deni tiegħi.

Jitgħabbew bl-għajb u bil-mistħija

dawk li jitkabbru minħabba fija.

27Jifirħu u jithennew dawk li jgħożżu l-ġustizzja tiegħi;

u jgħidu dejjem: ‘Kbir il-Mulej,

li jgħożż is-sliem tal-qaddej tiegħu!”

28Imbagħad ixandar ilsieni l-ġustizzja tiegħek,

il-jum kollu t-tifħir tiegħek.