1Il-kelma tal-Mulej li ġiet lill-profeta Ġeremija għall-Filistin, qabel ma l-Fargħun kien ħabat għal Gaża:
2“Dan jgħid il-Mulej:
Araw, l-ilmijiet telgħin mit-Tramuntana
u se jsiru xmara mfawra.
Se jgħarrqu l-art u kulma fiha,
il-belt u n-nies li jgħixu fiha.
Jgħajtu n-nies u jwerżqu,
dawk kollha li jgħammru fil-pajjiż.
3Għat-tqawqib taż-żwiemel qawwija tiegħu;
għall-ħsejjes kbar tal-karrijiet,
u l-irbumbjar tar-roti tiegħu,
il-missirijiet ma jdurux lejn uliedhom
minħabba t-telqa ta’ jdejhom.
4Għax wasal jum il-qerda
tal-Filistin ilkoll kemm huma,
biex jinqered għal Tir u għal Sidon,
kull min għad fadal jgħinhom.
Għax il-Mulej se jeqred il-Filistin,
il-bqija tal-gżira ta’ Kaftor.
5Qriegħet Gaża,
intemmet Askalon.
Int Asdod, fdal l-Għanakin,
kemm se ddum tqatta’ ġismek?
6Ah, ix-xabla tal-Mulej,
kemm se ddum ma tieqaf?
Erġa’ idħol f’għantek,
strieħ u iskot!
7Kif tista’ tieqaf
jekk jikkmandaha l-Mulej?
Askalon u x-xtajta tal-baħar,
għal hemm hu bagħatha?
Who We AreWhat We EelieveWhat We Do
2025 by iamachristian.org,Inc All rights reserved.
