ĠEREMIJA 9 - Maltese Bible with DC

Kapitlu 9Poplu mħassar

1Mhux li kont insib fejn nistkenn

fid-deżert, ħa nħalli l-poplu tiegħi,

u nitbiegħed minnhom.

Għax ilkoll kemm huma adulteri,

qatgħa ta’ nies ribelli.

2U għamlu minn ilsienhom qaws miġbud.

Il-qerq, u mhux is-sewwa,

isaltan fil-pajjiż.

Għax minn ħażen għal ħażen għaddejjin,

u bija ma jridux jafu,

oraklu tal-Mulej.

3Oqogħdu attenti minn xulxin ilkoll;

u ħadd ma għandu jafda f’ħuh.

Għax l-aħwa jaqilgħu lill-aħwa ’l barra,

u kull ħabib sejjer iqassas.

4Wieħed iqarraq bl-ieħor

u s-sewwa ma jgħiduh qatt,

għax ilsienhom darrewh fi kliem il-gideb.

Għejew jidinbu, u ma jridu jindmu qatt.

5Qalb il-qerq l-għamara tiegħek,

oraklu tal-Mulej,

u fil-qerq ma jridux jagħrfuni.

6Għalhekk dan jgħid il-Mulej tal-eżerċti:

“Arani, jien indewwibhom u nġarrabhom.

Nista’ nagħmel mod ieħor

ma’ bint il-poplu tiegħi?

7Ilsienhom vleġġa misnuna,

ħlief qerq fommhom ma jlissinx.

“Sliem!” jgħid lill-għajru,

u f’qalbu jlestilu n-nasba.

8U m’għandix nikkastigahom għal dan kollu?

Oraklu tal-Mulej.

U minn poplu bħal dan

m’għandix nitħallas?”

9Ngħolli leħen ta’ biki u tinwiħ għall-muntanji,

għanja tal-mewt għall-mergħat tad-deżert.

Għax maħruqa huma,

u ħadd ma jgħaddi aktar minnhom,

u ma jisimgħux aktar leħen l-imrieħel;

mit-tajra tal-ajru sal-bhejjem,

kollha ħarbu u telqu.

10U nagħmel gozz ġebel minn Ġerusalemm,

u bejta tax-xakalli;

u ħerba mill-ibliet ta’ Ġuda

u ħadd ma jgħammar fihom.

11Min hu l-għaref li jifhem dan?

U jgħid x’qallu fomm il-Mulej:

Għaliex l-art tħarbtet

u nħarqet bħad-deżert,

u ma jista’ jgħaddi minnha ħadd?

12U l-Mulej wieġeb: “Għax telqu l-liġi tiegħi, li jien qegħedt quddiemhom, u ma semgħux minn kliemi, u ma mxewx fuqu,

14Għalhekk dan jgħid il-Mulej tal-eżerċti, Alla ta’ Iżrael: “Arawni, se nitmagħhom l-absint u nisqihom l-ilma avvelenat.

16Dan jgħid il-Mulej tal-eżerċti:

“Qisu li ssejħu lill-bekkejja biex jiġu;

ibagħtu l-aħjar fosthom

ħa jgħaġġlu jiġu,

17u jfittxu jgħannulna għanja ta’ tinwiħ.

Ħa jgelgel minn għajnejna d-dmugħ,

u minn xfarhom inixxi l-ilma!

18Għax leħen it-tinwiħ

jinstama’ minn Sijon:

‘Ah! X’rovina ġietna,

x’għajb għalina.

Ikollna nitilqu artna,

u nħallu ’l djarna.’

19Iva, isimgħu, nisa, kelmet il-Mulej,

ħa jilqgħu widnejkom kelmet fommu;

għallmuha lil bnietkom it-tinwiħa,

u kull waħda lil seħbitha l-għanja tal-mewt.

20‘Għax telgħet il-mewt mit-twieqi

u daħlet fil-palazzi tagħna.

Qerdet it-tarbija fit-triq,

u ż-żgħażagħ fl-imsieraħ.’

21Tkellem: ‘Dan jgħid il-Mulej:

L-iġsma tan-nies maqtula

bħad-demel fuq wiċċ ir-raba’,

u bħal għamra wara l-ħassad

bla ma ħadd jiġborha.’ ”

22Dan jgħid il-Mulej:

“Ma għandux jiftaħar l-għaref b’għerfu,

u anqas ma għandu jiftaħar il-qalbieni bi qlubitu;

m’għandux jiftaħar l-għani b’ġidu.

23Imma min irid jiftaħar,

b’dan għandu jiftaħar:

li għandu d-dehen biex jagħrafni,

għax jien hu l-Mulej,

li nagħmel it-tjieba, il-ħaqq,

u s-sewwa fuq l-art,

għax b’dawn nitgħaxxaq,

oraklu tal-Mulej.

Iċ-ċirkonċiżjoni weħidha ma tiswa xejn

24Araw, għad jiġi żmien, oraklu tal-Mulej, meta jien inħallas lil dawk li huma maħtunin biss f’ġisimhom:, u jgħammru fid-deżert. Għax dawn il-ġnus, għad-dar ta’ Iżrael, ilkoll huma bla ħtin f’qalbhom.