HOSEGĦA 13 - Maltese Bible with DC

Kapitlu 13Il-kastig ta’ Efrajm

1Meta Efrajm kien jitkellem, kien ibażża’ n-nies,

għax kien prinċep f’Iżrael:

imma dineb minħabba Bagħal u miet.

2U issa baqgħu jidinbu,

u jagħmlu xbihat imdewba

mill-fided tagħhom;

idoli skont kif ifettlilhom,

kollha xogħol in-nies tas-sengħa.

“Lil dawn,” jgħidulhom, “offru s-sagrifiċċju,”

u n-nies ibusu l-għoġiela!

3Għalhekk ikunu bħal sħaba fis-sebħ,

u bħan-nida li tgħib malajr;

bħall-karfa li ttir mill-qiegħa,

u bħad-duħħan ħiereġ mit-tieqa.

4U jiena l-Mulej, Alla tiegħek

sa mill-art tal-Eġittu.

Int m’għandek ebda Alla ieħor ħliefi,

U m’hemmx għalik salvatur ieħor għajri.

5Jiena paxxejtek fid-deżert,

fl-art tan-nixfa.

6Imma aktar ma paxxejthom,

aktar ma mtlew u xebgħu,

aktar tkabbret qalbhom,

u lili nsewni.

7Inkun għalihom bħal iljun,

bħal ljupard fit-triq ngħassilhom.

8Inħebb għalihom bħal orsa

misruqa mill-frieħ tagħha,

u niftħilhom il-qafas ta’ sidirhom,

u nikolhom fil-post bħal iljun,

u bħall-bhejjem selvaġġi niżbranahom.

9Jien neqirdek, Iżrael,

imbagħad min jista’ jgħinek?

10Fejn hu s-sultan tiegħek biex isalvak?

Fejn huma prinċpijietek biex jaqbżu għalik?

Int kont għedt għalihom:

“Agħtini sultan u prinċpijiet.”

11Jien nagħtik sultan f’għadbi,

u nneħħihulek fis-saħna tiegħi.

12Misrur il-ħażen ta’ Efrajm,

merfugħ id-dnub tiegħu.

13Uġigħ il-ħlas għad jilħqu,

imma hu iben bla għaqal;

għax meta jasal il-waqt,

ma jersaqx lejn fomm il-ġuf.

14Neħlishom jien mill-qawwa tax-Xe’ol?

Jew mill-mewt nifdihom?

Fejn huma l-flaġelli tiegħek, mewt?

Fejn hija l-qerda tiegħek, Xe’ol?

Il-mogħdrija nħbiet minn għajnejja.

15U għax hu bejn l-aħwa jġib il-firda,

għad jiġih riħ mix-Xlokk,

riħ tal-Mulej ġej mid-deżert,

u jnixxiflu l-għajn,

u n-nixxiegħa jixxuttalu.

Jisraqlu t-teżor tal-ħwejjeġ prezzjużi.