ĠEREMIJA 46 - Maltese Bible with DC

Kapitlu 46L-orakli kontra l-ġnus

1Il-Kelma tal-Mulej dwar il-ġnus li ġiet lil Ġeremija l-profeta.Oraklu għall-Eġittu

2Għall-Eġittu. Dwar l-eżerċtu tal-Fargħun Neko, sultan tal-Eġittu li kien biswit ix-xmara Ewfrat ħdejn Karkemis u li kissru Nabukodonosor, sultan ta’ Babilonja, fir-raba’ sena ta’ Ġeħojakim bin Ġosija, sultan ta’ Ġuda:

3“Ħejju t-tarka l-kbira u ż-żgħira,

u ersqu għat-taqtigħa.

4Xiddu ż-żwiemel, u irkbu,

intom rikkieba!

Ħudu postkom bl-elmu f’raskom,

sinnu l-lanez,

ilbsu l-kurazzi.

5X’qiegħed nara?

Reġgħu lura kollha mwerwrin;

il-qalbiena tagħhom imkissra,

maħruba u mitlufa, ma jħarsux lura,

biża’ ma’ kullimkien,

oraklu tal-Mulej.

6Ma jaħrabx il-ħafif,

u l-qalbieni ma jeħlishiex.

Lejn it-Tramuntana, ħdejn xatt l-Ewfrat,

jitfixklu u jaqgħu.

7Min hu tiela’ bħan-Nil,

bħal xmajjar ilmijietu mqanqla.

8L-Eġittu tiela’ bħan-Nil,

b’ilmijietu mqanqla bħal xmajjar,

u hu jgħid: ‘Jien nitla’,

ngħatti l-art,

u neqred il-belt u lil min jgħammar fiha.’

9Itilgħu, żwiemel,

lebbtu ’l quddiem, imriekeb!

Oħorġu, qalbiena!

Nies minn Kus u Put, intom li taqbdu t-tarka,

nies minn Lud, li tħaddmu l-qaws.

10Dak il-Jum għal Sidi l-Mulej tal-eżerċti,

Jum il-vendetta,

ħa jitħallas mill-għedewwa tiegħu.

Ix-xabla għad tibla’, għad tixba’

u tisker f’demmhom:

tassew sagrifiċċju għal Sidi l-Mulej,

fl-inħawi tat-Tramuntana ħdejn ix-xmara Ewfrat.

11Itla’ f’Gilgħad, u ħu l-balzmu,

xbejba bint l-Eġittu.

Għalxejn tkattar id-dwiet,

m’hemmx fejqan għalik.

12Il-ġnus semgħu b’għajbek,

u l-karba tiegħek dwiet mal-art,

għax qalbieni jitfixkel f’qalbieni ieħor,

u t-tnejn flimkien jaqgħu fl-art.”

Oraklu għal Nabukodonosor

13Il-kelma li l-Mulej qal lill-profeta Ġeremija, meta Nabukodonosor, sultan ta’ Babilonja, ġie biex jaħbat għall-art tal-Eġittu:

14“Ħabbru fl-Eġittu,

u semmgħuh f’Migdol,

xandruh f’Nof u Taħfanħes.

Għidulu: ‘Qum fuq tiegħek u ħejji ruħek,

għax ix-xabla qiegħda tibla’ kollox madwarek.

15Għaliex ħarab Afi?

Għaliex il-gendus tiegħek ma waqafx?

Għax il-Mulej xeħtu mal-art.

16Il-kotra tiegħek tfixklet u waqgħet,

u bdew jgħidu lil xulxin:

‘Qum, ħa mmorru lura ma’ niesna,

u f’art twelidna, ’il bogħod mix-xabla qerrieda.’

17Agħtu dan l-isem lill-Fargħun,

sultan tal-Eġittu:

‘Ħsejjes waħdu, ħalla ż-żmien jgħaddi!’

18Daqs kemm jien ħaj,

oraklu tas-Sultan,

Jaħweh tal-eżerċti ismu,

bħat-Tabor fost il-muntanji għad jiġi,

bħall-Karmel fuq il-baħar.

19Lesti s-soror għall-eżilju,

xbejba, li tgħammar f’bint l-Eġittu.

Għax Nof ħerba għad issir,

irmied, mingħajr ħadd ma jgħammar fiha.

20Erħa sabiħa l-Eġittu,

xidja mit-Tramuntana ġiet fuqu.

21Sa l-mikrija li għandu f’nofsu

qishom għoġiela għas-simna.

Saħansitra huma

daru u ħarbu lura,

u ma żammewx iebes;

għax jum it-telfien waslilhom,

is-siegħa ta’ kastighom.

22Leħnu bħal serp isaffar,

għax ġejjin bil-qawwa tal-eżerċtu;

bl-imnajjar ġejjin għalih,

bħal dawk li jqaċċtu s-siġar.

23Iqaċċtulu l-masġar tiegħu,

oraklu tal-Mulej,

għalkemm ma tgħaddix minnu,

għax kotrana huma aktar mill-ġradijiet,

ma jingħaddux.

24Bint l-Eġittu ġiet fl-għajb,

mitluqa f’idejn poplu tat-Tramuntana.”

Oraklu għal Iżrael

25Il-kelma tal-Mulej tal-eżerċti, Alla ta’ Iżrael: “Arawni! Jien nikkastiga lil Amon ta’ No, l-Eġittu, lill-allat tiegħu u s-slaten tiegħu, u lill-Fargħun, u ’l dawk li jafdaw fih.

27“U int la tibżax, Ġakobb,

il-qaddej tiegħi;

u la titwerwirx, o Iżrael;

għax, arani, jien insalvak mill-bogħod,

u lil nislek minn art l-eżilju tagħhom.

Ġakobb jerġa’ lura u jgħix fil-kwiet,

fiż-żgur, bla ħadd ma jbeżżgħu.

28Int, Ġakobb il-qaddej tiegħi,

la tibżax,

oraklu tal-Mulej,

għax miegħek jien;

jien neqred il-ġnus kollha,

li fosthom jien xerridtek;

imma minnek ma nagħmilx qerda;

nikkastigak kemm jistħoqqlok,

bla kastig għalkollox ma nħallikx.”