1U Balgħam qal lil Balak: “Ibnili hawn seba’ artali, u lestili seba’ għoġiela u seba’ mtaten.”
2U Balak għamel kif qallu Balgħam. U Balgħam u Balak offrew għoġol u muntun fuq kull artal;
3u Balgħam qal lil Balak: “Int oqgħod ħdejn is-sagrifiċċju tiegħek, u jien nitbiegħed; għandu mnejn jiġi l-Mulej jiltaqa’ miegħi, u ngħidlek kulma jurini.” U telaq lejn għolja għerja.
4U l-Mulej ġie jiltaqa’ miegħu, u Balgħam qallu: “Jien lestejt seba’ artali, u offrejt għoġol u muntun fuq kull artal.”
5U l-Mulej qiegħed dan il-kliem fuq fomm Balgħam u qallu: “Erġa’ lura lejn Balak u għidlu li ngħidlek jien.”
6U raġa’ mar ħdejh u sabu wieqaf ħdejn is-sagrifiċċju tiegħu, hu u l-prinċpijiet kollha ta’ Mowab, u
7beda jitkellem u jgħid:
“Minn Aram ġiebni Balak,
is-Sultan ta’ Mowab mill-għoljiet tal-Lvant:
‘Ejja u isħetli lil Ġakobb;
Ejja u idgħili lil Iżrael.’
8Kif nista’ nisħet lil min Alla ma seħtux?
u kif nidgħi lil min Alla ma dgħalux?
9Minn fuq il-qċaċet tal-blat qiegħed narah;
nħares lejh minn fuq l-għoljiet.
Dan poplu jgħammar waħdu;
mal-ġnus ma jitħallatx.
10Min għaddu trab Ġakobb,
u min jgħodd ir-ramel ta’ Iżrael?
Jalla mmut bħalma jmut il-ġust,
u tmiemi jkun bħal tmiemu.”
11Imbagħad Balak qal lil Balgħam: “X’għamiltli! Jien ġibtek biex tisħetli l-għedewwa tiegħi, u issa int qiegħed tberikhom!”
12U wieġbu: “Mhux il-kliem li jqegħedli l-Mulej fuq fommi għandi nqis li ngħid?”
It-tieni oraklu13U Balak qallu: “Ejja miegħi post ieħor mnejn tista’ tarahom. Tarf biss minnu tista’ tara, ma tarahx kollu, u isħethuli minn hemm.”
14Ħadu fil-wita ta’ Sofim fuq il-quċċata tal-Pisga, u bena hemm seba’ artali, u offra għoġol u muntun fuq kull artal.
15U qal lil Balak: “Oqgħod wieqaf ħdejn is-sagrifiċċju tiegħek, u jien ikolli laqgħa hemm.”
16U l-Mulej iltaqa’ ma’ Balgħam, u qegħedlu dan il-kliem fuq fommu, u qallu: “Erġa’ lura u mur għand Balak, u għidlu li se ngħidlek.”
17U ġie ħdejh, u sabu wieqaf ħdejn is-sagrifiċċju, u l-prinċpijiet ta’ Mowab miegħu. U Balak staqsieh: “X’jgħid il-Mulej?”
18U Balgħam raġa’ beda jitkellem u jgħid:
“Qum Balak u isma’;
agħtini widen bin Siffur.
19Alla mhux bniedem biex jigdeb;
anqas bin Adam biex jibdielu.
Forsi jgħid u ma jagħmilx?
jitkellem, u ma jżommx kelmtu?
20Arani! Ordnali nbierek.
Hu bierek, u jiena ma nistax
il-barka reġġa’ lura!
21Ebda deni ma sab f’Ġakobb;
u ebda ħażen ma ra f’Iżrael.
Il-Mulej, Alla tiegħu, miegħu;
sultan milqugħ b’għajjat ta’ ferħ.
22Bħalma huma l-qrun għall-gendus selvaġġ,
hekk għalihom Alla, li ħariġhom mill-Eġittu.
23Ma hemmx seħer kontra Ġakobb;
ma hemmx magħmul kontra Iżrael.
Issa huwa l-waqt li jgħidu minn Ġakobb u Iżrael:
‘Araw Alla x’għamel!’
24Araw hawn poplu! Bħal iljun iqum,
bħal iljun jieqaf fuq riġlejh;
ma jistrieħx qabel ma jqarmeċ il-priża,
qabel ma jixrob demm il-maqtulin.”
25U Balak qal lil Balgħam: “Tisħtu xejn. Jekk int m’intix se tisħtu, anqas m’għandek tbierku.”
26U Balgħam wieġeb lil Balak: “Ma kellimtekx u għedtlek li jien nagħmel dak li jgħidli l-Mulej?”
It-tielet oraklu27U Balak qal lil Balgħam: “Ejja nieħdok naħa oħra, għandu mnejn Alla jogħġbu li tisħethuli minn hemm.”
28U Balak ħa lil Balgħam fuq il-quċċata ta’ Pegħor, li tħares lejn id-deżert.
29U Balgħam qal lil Balak: “Ibnili hawn seba’ artali, u lestili seba’ għoġiela u seba’ mtaten.”
30U Balak għamel kif ordnalu Balgħam, u offra għoġol u muntun fuq kull artal.
Who We AreWhat We EelieveWhat We Do
2025 by iamachristian.org,Inc All rights reserved.
