1Hekk jagħmel min jibża’ mill-Mulej;
u min iżomm il-Liġi jikseb l-għerf.
2L-għerf joħroġ jiltaqa’ miegħu bħallikieku ommu,
u jilqgħu bħalkieku mart żgħożitu.
3Jitimgħu bil-ħobż tal-fehma,
u jisqih l-ilma tal-għerf.
4Iserraħ fuq l-għerf u ma jmil qatt,
iżomm miegħu u ma jkollux għax jistħi.
5U l-għerf jgħollih fuq il-ġirien tiegħu,
u f’nofs il-ġemgħa jiftaħlu fommu.
6Isib hena u kuruna ta’ ferħ,
u jagħmel isem għal dejjem.
7In-nies boloh ma jiksbuhx,
u l-bnedmin midinba ma jarawhx.
8L-għerf hu ’l bogħod minn bniedem kburi,
u n-nies qarrieqa ma jiftakrux fih.
9It-tifħir fuq fomm il-midneb hu barra minn postu,
għaliex mhuwiex imnebbaħ lilu mill-Mulej.
10It-tifħir għandu jingħad skont l-għerf,
u jirnexxi bl-għajnuna tal-Mulej.
Il-libertà tal-bniedem11Tgħidx: “Ħtija tal-Mulej tbegħidt”,
għax min jobgħod xi ħaġa ma jagħmilhiex.
12Tgħidx: “Hu ħariġni mit-triq it-tajba”,
għax hu m’għandux bżonn il-bniedem midneb.
13Il-Mulej jobgħod kulma hu ta’ min jistmerru,
u dan ma jħobbuhx dawk li jibżgħu mill-Mulej.
14Hu mill-bidu għamel il-bniedem,
u ħallieh f’idejn ir-rieda tiegħu.
15Jekk trid tista’ tħares il-kmandamenti,
u b’rieda tajba tista’ tkun fidil.
16Hu qegħedlek quddiemek in-nar u l-ilma;
liema trid minnhom, midd idek għalih.
17Quddiem il-bniedem hemm il-ħajja u l-mewt,
u liema tixtieq qalbu lesta għalih.
18Għax għerf il-Mulej hu bla qjies,
qawwi f’setegħtu u jara kollox.
19Għajnejh fuq dawk li jibżgħu minnu,
u jagħraf kulma jagħmel il-bniedem.
20Lil ħadd ma qabbad jgħix ħażin,
u lil ħadd ma rħielu jidneb.
Who We AreWhat We EelieveWhat We Do
2025 by iamachristian.org,Inc All rights reserved.
