EŻEKJEL 27 - Maltese Bible with DC

Kapitlu 27L-allegorija tal-ġifen: Tir

1U ġietni l-kelma tal-Mulej u qalli:

2“Inti, o bniedem, għanni għanja ta’ biki għal Tir.

3Għid lil Tir, sultana fuq dħul il-baħar,

neguzjanta tal-popli f’ħafna gżejjer,

dan jgħid Sidi l-Mulej;

Tir, int għedt:

‘Jiena ġifen ta’ ġmiel bla qjies!’

4F’nofs l-ibħra trufijietek,

il-bennejja tiegħek fawruk bi ġmielek;

5biċ-ċipress minn Xenir ħadmulek it-tavlar.

Miċ-ċedru tal-Libanu ħadu

biex jagħmlulek l-arblu.

6Mill-ballut ta’ Basan

għamlulek l-imqadef.

Il-gverta għamluhielek miċ-ċipress

mill-gżejjer tal-Kittin,

intarsjata bl-avorju.

7Għażel irrakkmat mill-Eġittu

kien il-qlugħ tiegħek,

u kien iservi ta’ bandiera;

porpra u skarlatt minn xtut Elisa

kienet it-tinda tiegħek.

8Ta’ Sidon u ta’ Arwad

kienu l-qaddiefa tiegħek;

u l-bdoti tiegħek nies imħarrġa minn Semer.

9Ix-xjuħ ta’ Gebal u n-nies imħarrġa tagħha

kienu l-qlafat ta’ xquqek.

Il-kummerċ tal-Feniċi

“L-iġfien kollha tal-baħar u l-baħħara kienu jiġu għandek ipartu l-merkanzija tiegħek.

10Paras, Lud u Put kienu fl-eżerċtu tiegħek, nies gwerriera; it-tarka u l-elmu dendlu miegħek, u komplew żidulek ġmielek.

11“In-nies ta’ Arwad u ta’ Ħalek kienu fuq id-dawra tas-swar tiegħek, u l-Gammedin fuq it-torrijiet; u tarkiethom dendluhom ma’ swarek dawramejt, u komplew żidulek ġmiel fuq ġmiel.

12“Tarsis kienet tinnegozja miegħek, minħabba l-ġid kbir li kellek; kienu jpartu l-fidda, il-ħadid, il-landa, u ċ-ċomb mal-merkanzija tiegħek.

13“Kienu jinneguzjaw miegħek Ġawan, Tubal u Mesek: kienu jpartu l-ilsiera u l-ħwejjeġ tal-bronż mal-merkanzija tiegħek.

14“In-nies ta’ Bet-togarma kienu jpartu żwiemel tat-tagħbija, żwiemel tal-ġiri, u bgħula mal-merkanzija tiegħek.

15“Kienu jinneguzjaw miegħek in-nies ta’ Dedan. Ħafna gżejjer il-kummerċ tagħhom kien f’idejk, u kienu jħallsuk bl-injieb tal-avorju u l-ebbanu.

16“Kien jinnegozja miegħek Edom minħabba l-ħafna xogħlijiet tiegħek; kienu jpartu miegħek il-karbunklu, il-porpra, il-brukkat, l-għażel fin, il-qroll u r-rubini mal-merkanzija tiegħek.

17“Ġuda u art Iżrael, huma wkoll kienu jinneguzjaw miegħek il-qamħ ta’ Minnit, tin, għasel, żejt, u balzmu.

18“Damasku wkoll kien jinnegozja miegħek minħabba l-ħafna xogħlijiet tiegħek u l-ġid kbir li kellek. Kienu jħallsuk bl-inbid ta’ Ħelbon u s-suf ta’ Saħar.

19U Ġawan kienu jpartu l-inbid minn Użal mal-merkanzija tiegħek; ħadid fondut, kassja u qasab tal-fwieħa kienu jpartu miegħek.

20“Dedan kien ukoll jinnegozja s-sruġ għar-rkib.

21“L-Għarab u l-prinċpijiet ta’ Kedar huma wkoll kienu n-neguzjanti tiegħek; kienu jinneguzjaw miegħek il-ħrief, l-imtaten u l-bdabad.

22“Il-merkanti ta’ Saba u Ragħma, huma wkoll kienu jinneguzjaw miegħek, u kienu jpartu mal-merkanzija tiegħek kull xorta ta’ ħwawar mill-aħjar u ħaġar prezzjuż u deheb.

23“Ħaran, Kanni u Għeden, in-neguzjanti ta’ Saba, Assur, u Kilmad kienu wkoll jinneguzjaw miegħek;

31Iqaxxru rashom minħabba fik,

u jxiddu l-ixkejjer;

jibkuk bl-imrar f’qalbhom,

u b’sogħba ta’ swied il-qalb.

32U jgħannulek lamentazzjoni, inewħu għalik

u jgħidu: ‘Min kien bħal Tir,

meqruda f’nofs ta’ baħar?’

33Meta l-merkanzija tiegħek

kienet toħroġ mill-ibħra,

kont ixxabba’ l-ħafna popli bil-ġid kbir tiegħek;

bil-merkanzija tiegħek kont tagħni

s-slaten tal-art.

34Issa kissrek il-baħar,

u tinsab f’qiegħ l-ibħra;

il-merkanzija tiegħek u l-ekwipaġġi

kollha għerqu miegħek.

35In-nies li jgħammru fil-gżejjer bliehu minħabba fik;

u s-slaten tagħhom tkexkxu,

u nxtorob wiċċhom.

36In-neguzjanti fost il-popli bdew isaffrulek.

Sirt il-waħx tad-dinja,

spiċċajt għal dejjem!”