BIN SIRAK 34 - Maltese Bible with DC

Kapitlu 34Il-ħolm

1Tamiet fiergħa u qarrieqa ssibhom għand bniedem bla moħħ,

u bil-ħolm il-boloh itellgħu l-ġwienaħ.

2Bħal wieħed jipprova jaqbad id-dellijiet jew jiġri wara r-riħ,

hekk hu min jagħti kas tal-ħolm.

3Dan biswit dak: hekk hi dehra fil-ħolm;

quddiem wiċċ xbieha ta’ wiċċ.

4X’jiġi msoffi b’ħaġa mniġġsa?

U x’jiġi ppruvat veru b’ħaġa qarrieqa?

5Tbassir, teħbir, u ħolm kollhom frugħa,

bħal thewdin il-moħħ ta’ mara fil-ħlas.

6Jekk mhumiex mibgħuta mill-Għoli bħallikieku qed iżurek,

lanqas biss m’għandek taħseb fuqhom.

7Il-ħolm qarraq b’ħafna,

u dawk li ttamaw fih stennew ta’ xejn.

8Mingħajr dal-qerq isseħħ il-Liġi,

u l-milja tal-għerf qiegħda fuq fomm sinċier.

L-ivvjaġġar

9Bniedem li jivvjaġġa,

u min hu ta’ esperjenza, jaf x’għandu jgħid.

10Ftit jaf min ma ġarrabx;

imma min ġera jitkellem ta’ wieħed li jifhem.

11Rajt ħafna fil-vjaġġi tiegħi,

u fhimt iktar milli nista’ ngħid bil-kliem.

12Ħafna drabi rajt il-mewt,

imma ħlistha minħabba l-esperjenza.

13L-ispirtu ta’ dawk li jibżgħu mill-Mulej jibqa’ ħaj,

għax it-tama tagħhom qiegħda f’dak li jsalvahom.

14Min għandu l-biża’ tal-Mulej minn xejn ma jibża’;

u ma jaqtax qalbu, għax il-Mulej it-tama tiegħu.

15Hieni min jibża’ mill-Mulej!

Fuq min se joqgħod? U fuq min se jserraħ?

16Għajnejn il-Mulej fuq dawk li jħobbuh;

hu ta’ qawwa biex tistkenn warajh,

u ta’ saħħa biex isserraħ fuqu,

jagħtik kenn mir-riħ sħun u mis-sħana ta’ nofsinhar,

iħarsek mit-tfixkil u jgħinek biex ma taqax,

17jerfgħek fl-ispirtu u jdawwallek għajnejk,

jagħtik il-fejqan, il-ħajja, u l-barka.

Is-sagrifiċċji

18Jekk xi ħadd joffri b’sagrifiċċju mill-qligħ

inġust tiegħu l-offerta tkun daħka fil-wiċċ,

u l-għotjiet ta’ min ma jħarisx il-Liġi ma jogħġbux il-Mulej.

19Ma jogħġbux lill-Għoli l-offerti ta’ dawk li ma jibżgħux minnu,

u ma jitħallasx għad-dnubiet b’kotra ta’ sagrifiċċji.

20Bħal min joqtol iben quddiem għajnejn missieru,

hekk hu min joffri sagrifiċċju minn ħwejjeġ il-fqir.

21Il-ħobż ta’ min hu fil-bżonn hu l-għajxien tal-fqir,

u min jeħodhulu hu bniedem imċappas bid-demm.

22Joqtol il-proxxmu min jeħodlu l-għajxien tiegħu,

u jċarċar id-demm min iżomm ħlas il-lavrant.

23Wieħed jibni u ieħor iħott;

x’se jieħdu aktar minn tbatija?

24Wieħed jitlob u ieħor jisħet;

leħen min se jisma’ s-Sid?

25Min jinħasel wara li jkun mess ġisem mejjet u mbagħad jerġa’ jmissu,

xi jkun ħa bil-ħasil tiegħu?

26Hekk il-bniedem li jsum għal dnubietu

u jerġa’ jmur jagħmel l-istess;

min se jagħti widen għat-talba tiegħu?

Xi jkun ħa billi jkun ċekken lilu nnifsu?