ISAIJA 13 - Maltese Bible with DC

Kapitlu 13L-oraklu fuq Babilonja

1Oraklu fuq Babilonja. Viżjoni li kellu Isaija bin Amos:

2Fuq għolja xagħrija tellgħu stendard;

għollu leħinkom lejhom,

xejrulhom idkom,

ħalli jidħlu minn bwieb il-kbarat.

3Jien tajt l-ordni lill-qaddisin tiegħi,

sejjaħt lill-gwerriera qalbiena tiegħi,

kollhom ħeġġa għall-glorja tiegħi,

biex jagħmlu li jrid għadbi.

4Isimgħu l-għagħa fuq il-muntanji,

għagħa ta’ poplu sħiħ.

Isimgħu t-tgeġwiġ ta’ saltniet u ġnus miġmugħa;

il-Mulej tal-eżerċti għaddej

minn nofs eżerċtu lest għall-gwerra.

5Ġejjin minn art imbiegħda,

minn truf is-smewwiet,

il-Mulej u t-tagħmir ta’ għadbu,

biex jagħmel ħerba mid-dinja kollha.

6Ixhru, għax qorob Jum il-Mulej,

bħal qerda mingħand is-Setgħan.

7Għalhekk idejn kulħadd jintelqu,

u qalb kull bniedem tinħall,

u lkoll jitwerwru.

8Uġigħ u brim jaqbadhom,

bħal mara fil-ħlas jitkagħwġu;

miblugħin iħarsu lejn xulxin,

wiċċhom wiċċ in-nar.Jum il-Mulej

9Araw, Jum il-Mulej għad jasal,

kiefer, imgħaddab, ħuġġieġa nar bil-korla,

biex jagħmel mill-art ħerba,

u jeqred minnha l-midinbin.

10Il-kwiekeb tas-smewwiet u l-ġemgħat tagħhom

ma jarmux aktar id-dija tad-dawl tagħhom.

Hi u tielgħa, ix-xemx tiddallam,

u l-qamar ma jroxx dawlu.

11Jien nitħallas mid-dinja għal ħżunitha,

u mill-ħżiena għal ħtijiethom.

Inġib fix-xejn il-kburija tas-suppervi,

u n-nies vjolenti mmidd mal-art.

12Nagħmel in-nies aktar rari mid-deheb fin,

u l-bnedmin jonqsu aktar mid-deheb ta’ Ofir.

13Is-smewwiet jitqallbu ta’ taħt fuq,

u minn sisienha titheżżeż l-art,

bis-saħna tal-Mulej tal-eżerċti,

f’jum in-nar tal-korla tiegħu.

14Imbagħad bħal għażżiela jiġru warajha,

bħal merħla m’hemm ħadd jiġborha,

idur kull wieħed lejn il-poplu tiegħu,

u kull bniedem lejn artu jaħrab.

15Kull min jinsab, jinfduh;

kull min jinqabad, jgħadduh mix-xabla.

16Itertqulhom it-trabi quddiem għajnejhom;

Jisirqulhom ’il djarhom u san-nisa jkasbrulhom.

17Arawni, jien inqajjem għalihom il-Medi,

li l-fidda ma jaħsbux fiha,

u anqas għad-deheb ma jagħmlu.

18Qwieshom itertqu ż-żgħażagħ,

bla ħniena għal frott il-ġuf,

bla ħasra għall-ulied.

Il-Medi jkissru ’l Babilonja

19Issir Babilonja, il-ġawhra tal-imperi,

iż-żina u l-foħrija tal-Kaldin,

bħal Sodoma u Gomorra,

meta ġġarrfu b’idejn Alla.

20Qatt aktar ma titgħammar,

minn żmien għal żmien ħadd aktar ma joqgħod fiha.

L-Għarbi ma jtellax l-għarix fiha,

u r-rgħajja ma jserrħux l-imrieħel tagħhom.

21Imma hemm jistrieħu l-bhejjem tax-xagħri;

fi djarhom tbejjet il-kokka,

u jgħammru n-ngħam.

Hemm jaqbżu l-mogħoż selvaġġi;

22tnewwaħ il-jena fil-kastelli tagħhom,

u x-xakalli fi djarhom tal-pjaċir.

Is-siegħa tagħha waslet,

u jiemha iżjed ma jtulux.