ĦABAKKUK 3 - Maltese Bible with DC

Kapitlu 3Sejħa għall-għajnuna tal-Mulej

1Talba tal-profeta Ħabakkuk, fuq it-ton

tal-għana ta’ niket.

2Mulej, waslet f’widnejja l-fama tiegħek,

mill-għemil tiegħek jiena bżajt, Mulej.

Sa ftit snin oħra ġeddu,

sa ftit snin oħra għarrfu!’

Fil-korla, ġib quddiem għajnejk il-ħniena.

3Alla ġej minn Teman,

mill-muntanja Faran ġej il-Qaddis.

Sebħu jiksi s-smewwiet,

foħritu timla l-art.

4Dijietu qisha dawl ix-xemx,

minn idu jleħħu r-raġġi:

hemmhekk tinsab moħbija l-qawwa tiegħu.

5Quddiemu timxi l-pesta,

u wara passih jiġi d-deni,

6Jieqaf, u jriegħed l-art,

iħares, u jkexkex il-ġnus:

imbagħad il-muntanji dejjiema

jitqanqlu minn posthom,

l-għoljiet ta’ żmien il-qedem jitbaxxew,

triqatu sa minn dejjem.

7It-tined ta’ Kusan rajthom jitbeżżgħu,

rajt l-għerejjex t’art Midjan jirtogħdu.

8Jaqaw tixgħel il-korla tiegħek kontra x-xmajjar

jew kontra l-baħar qilltek,

meta int, Mulej, tirkeb iż-żwiemel tiegħek

u l-karru tar-rebħ tiegħek?

9Terfa’ l-qaws tiegħek għeri,

il-watar tiegħek timlieh sew bil-vleġeġ.

Int tofroq l-art bix-xmajjar,

10jilmħuk il-muntanji, u jitheżżu;

jitqalleb l-ilma b’saħħa kbira u jgħaddi;

jgħajjat l-abbiss u jerfa’ idejh fl-għoli.

11Ix-xemx u l-qamar waqfu f’posthom,

ħarbu kif raw ileħħu l-vleġeġ tiegħek,

u l-lanza tiegħek toħroġ dawl li jgħammex.

12Int b’korla fuqek tgħaddi minn nofs l-art,

u tgħaffeġ b’saħna l-ġnus.

13Int ħriġt sabiex issalva l-poplu tiegħek,

issalva l-midluk tiegħek.

Dar il-ħażin ġarraftha mill-quċċata,

kxiftilha l-pedament sa deher il-blat.

14Infidt bix-xettru tiegħek

ras il-gwerriera tiegħu,

li nxteħtu fuqi b’ferħ biex jeqirduni,

bħalkieku biex jibilgħu ’l min hu msejken,

f’xi mkien fis-satra,

15Għaddejt biż-żwiemel tiegħek fuq il-baħar,

fuq it-tqalligħ tal-ilmijiet kotrana.

16Jien smajt, u ħassejt fija rogħda kbira,

għal dan il-ħoss xufftejja bdew jirtogħdu;

ħassejt għadmi jitmermer,

passija bdew jitriegħdu taħti.

Noqgħod bil-kwiet nistenna Jum l-għawġ

li għad ifeġġ għall-ġens li qed jisħaqna.

17U mqar jekk ebda nwar ma trodd it-tina,

u xejn ma jagħtu d-dwieli

u l-frott tas-siġar taż-żebbuġ iqarraq,

u r-raba’ xejn ma jibqa’ jrodd għall-ikel,

u l-merħla tgħib mill-mandra,

u bhejjem ma jkunx hemm fl-istalel tagħhom,

18jien xorta waħda nifraħ fil-Mulej,

nithenna f’Alla, is-salvazzjoni tiegħi!

19Il-Mulej Sidi huwa l-qawwa tiegħi;

riġlejja jagħmilhomli bħal taċ-ċriev

u fuq l-għoljiet jeħodni.

Lill-mexxej tal-kor; bid-daqq tal-kordi.