1Dan jgħid il-Mulej:
“Żommu s-sewwa u agħmlu l-ġustizzja,
għax is-salvazzjoni tiegħi għoddha waslet,
u l-ġustizzja tiegħi dalwaqt tfeġġ.”
2Hieni r-raġel li jagħmel dan,
u l-bniedem li jżomm sħiħ fih,
iħares is-Sibt u ma jiksrux,
u jżomm idu ’l bogħod mill-għemil ħażin.”
3U ma jgħidx il-frustier li jintrabat mal-Mulej:
“Se jifridni l-Mulej mill-poplu tiegħu.”
Ma jgħidx l-ewnuku: “Arawni, jiena siġra niexfa!”
4Għax dan jgħid il-Mulej:
“Għall-ewnuki li jħarsu Sibtijieti,
u jagħżlu dak li jogħġob lili,
u jżomm sħiħ fil-patt tiegħi,
5jiena nagħtihom f’dari u swari,
nagħtihom monument u isem,
xi ħaġa aħjar minn subien u bniet;
nagħtihom isem għal dejjem,
li ma jitħassar qatt.
6Ulied il-frustier li ntrabtu mal-Mulej biex jaqduh,
u biex iħobbu isem il-Mulej,
u jkunu qaddejja tiegħu,
kull min iħares is-Sibt u ma jiksrux
u jżomm sħiħ fil-patt tiegħi,
7lil dawn inwassalhom sal-muntanja mqaddsa tiegħi,
u nferraħhom f’dar it-talb tiegħi;
il-vittmi maħruqa u s-sagrifiċċji tagħhom
ikunu jogħġbuni telgħin minn fuq l-artal tiegħi,
għax dari ‘dar it-talb’ tissejjaħ għall-popli kollha.
8Oraklu ta’ Sidi l-Mulej,
li jiġbor l-imxerrdin ta’ Iżrael;
“Nissokta niġbor l-itturufnati tiegħu
flimkien ma’ dawk li diġà ġbart.”
Il-kundanna tal-idolatrija ta’ Iżrael9Intom bhejjem tar-raba’,
ejjew kulu,
intom bhejjem tal-foresta.
10L-għassiesa tal-poplu tiegħi,
ilkoll għomja, ma jintebħu b’xejn;
ilkoll klieb muti,
ma jistgħux jinbħu.
Jimteddu u joħolmu,
ħsiebhom biex jorqdu.
11Huma klieb rgħiba,
ma jixbgħu qatt.
Dawn huma r-rgħajja,
li ma jafux jaħsbu.
Qabdu triqthom ilkoll,
kulħadd jaħseb għal rasu.
12Ejjew ħa nġibu l-inbid,
u niskru bix-xorb qawwi.
Għada jkun bħal-lum,
anzi aħjar, u ħafna aħjar.”
Who We AreWhat We EelieveWhat We Do
2025 by iamachristian.org,Inc All rights reserved.
