1Kemm int sabiħa, maħbuba tiegħi,
kemm int sabiħa!
Għajnejk qishom ħamiem
minn wara l-istar tiegħek.
Dak xagħrek merħla mogħoż
imewġu mal-muntanji ta’ Gilgħad.
2Dawk snienek qishom merħla nagħaġ imġiżża
telgħin wara l-ħasil.
Kull waħda minnhom hemm tewmija magħha,
ma hemm mingħajrha ebda waħda minnhom.
3Ħajta ħamra dagħmiena huma xufftejk,
id-diskors tiegħek ħelu.
Ħaddejk biċċtejn rummien
minn wara l-istar tiegħek.
4Għonqok, torri ta’ David,
li nbena ħalli fih jintrefgħu l-armi.
Elf tarka hemm fih imdendla,
tarkiet tal-qalbenin, ilkoll kemm huma.
5Jixbah lil żewġt ifrieħ taċ-ċerva sidrek,
ulied tewmin t’għażżiela,
li jirgħu qalb il-ġilji.
6Qabel ma taqa’ s-sirda
u d-dellijiet jaħarbu,
lejn il-muntanja rrid immur tal-mirra,
lejn tal-inċens l-għoljiet.
7Kollok sabiħa, maħbuba tiegħi,
u tebgħa fik ma hemmx!
8Ejja minn fuq il-Libanu, għarusa tiegħi,
ejja mil-Libanu għad-daħla tiegħek.
Ħares minn fuq il-qċaċet ta’ Amana,
minn fuq dawk ta’ Senir u ta’ Ħermon,
minn dawk l-għerien tal-ljuni,
muntanji tal-ljupardi.
9Inti sraqtli lil qalbi, għarusa tiegħi,
inti sraqtli lil qalbi, oħti,
sa b’ħarsa waħda tiegħek,
sa b’waħda biss mill-ġawhar ta’ fuq għonqok!
10Imħabbtek kemm hi ħelwa,
oħti, għarusa,
kemm hi aħjar imħabbtek mill-inbid!
Riħet fwiħatek oħla minn kull balzmu!
11Xufftejk, għarusa tiegħi, iqattru għasel safi,
u taħt ilsienek għasel u ħalib.
Riħet l-ilbiesi tiegħek
bħal dik tal-Libanu.
12Ġnien magħluq tajjeb int, oħti, għarusa tiegħi,
ġnien magħluq tajjeb, għajn issiġillata.
13Jinbet ġnien tar-rummien minn ilmijietek,
flimkien mal-ogħla ħxejjex:
il-ward tal-ħenna, u l-ispika,
14spika u żagħfran,
qasab ifuħ, kannella,
kull siġra tal-inċens,
mirra, sabbara,
u l-aqwa balzmi kollha.
15Int għajn tal-ġonna,
int ġiebja tilma ġieri,
nieżel mil-Libanu!L-għarusa
16Qum, Tramuntana,
riħ isfel, ejja,
onfoħ fuq il-ġnien tiegħi,
ħalli s-siġar tal-balzmu tiegħu jqattru!
Ħa jiġi l-maħbub tiegħi fil-ġnien tiegħu
u jiekol mill-frott tiegħu kollu benna!
Who We AreWhat We EelieveWhat We Do
2025 by iamachristian.org,Inc All rights reserved.
