ĠOB 3 - Maltese Bible with DC

Kapitlu 3Ġob jisħet xortih

1Wara dan Ġob fetaħ fommu,

seħet jum twelidu,

2u qabad jgħid:

3“Qerda għal jum twelidi,

għal-lejl li qal ‘Tnissel raġel.’

4Ħa jinbidel fi dlam dak il-jum,

ma jfittxux Alla mill-għoli,

u ma jfiġġ qatt id-dawl fuqu!

5Jagħmluh tagħhom id-dlam u s-swied,

ħa jiksih is-sħab oħxon,

u twaħħxu l-eklissi.

6Dak il-lejl ħa tkeffnu dalma,

ma jidhirx mal-jiem tas-sena,

u ma jidħolx fl-għadd tax-xhur.

7Ħa jkun, iva, dak il-lejl bla ħajja,

u ma jidwix fih għajjat ta’ ferħ.

8Ħa jisħtuh dawk li jisħtu l-jum,

l-imħarrġin biex iqajmu l-Levjatan.

9Jiddallmu l-kwiekeb taż-żerniq tiegħu,

jistenna għal xejn li jfiġġ id-dawl,

u ma jarax tbexbix is-sebħ,

10talli ma żammlix magħluqa bwieb il-ġuf,

u t-taħbit minn għajnejja ma ħebiex.

11Għaliex ma mittx fi ħdan ommi?

Għaliex ma bqajtx fil-ġuf u mitt?

12Għaliex laqgħuni l-irkupptejn?

Għaliex sidrejn biex nerda’?

13Kieku issa jien mimdud u sieket,

kont inkun rieqed u mistrieħ

14mas-slaten u l-kunsillieri tal-art,

jew mal-kbarat li bnew mill-ġdid il-ħerbiet;

15u mal-prinċpijiet li kellhom id-deheb,

li mlew djarhom bil-fidda.

16Għaliex ma kontx bħal rimi moħbi,

bħat-trabi li qatt ma raw id-dawl?

17Hemm il-ħżiena jehdew mill-inkwiet,

u l-għajjenin isibu l-mistrieħ.

18Hemm il-priġunieri lkoll fil-kwiet,

bla ma jisimgħu leħen l-argużin.

19Iż-żgħir u l-kbir hemmhekk qegħdin,

u l-ilsir ħieles minn sidu.

20Għaliex jingħata d-dawl lill-imsejken,

u l-ħajja lil min qalbu kollha mrar?

21Lil dawk li jixxennqu għall-mewt bla ma tiġihom,

u jħaffru għaliha aktar milli għal teżor;

22li jifirħu u jaqbżu bil-ferħ,

jogħxew meta jsibu l-qabar?

23Għaliex il-ħajja lil min triqtu magħluqa,

li Alla għalaq minn kull naħa?

24Għalhekk sar il-krib l-ikel tiegħi,

u jgelgel bħall-ilma t-tnehid tiegħi.

25Għax dak li nibża’ minnu jiġi fuqi,

u dak li jwerwirni jilħaqni.

26M’hemmx kwiet għalija, lanqas sliem,

dejjem bl-inkwiet, ma nistrieħ qatt.”