SALMI 75 - Maltese Bible with DC

Salm 75Alla hu l-imħallef

1Għall-mexxej tal-kor. Fuq “La teqridx”. Salm ta’ Asaf.

2Lilek infaħħru, o Alla, lilek infaħħru;

ismek inxandru, għemilek tal-għaġeb inħabbru.

3“Meta jasal il-waqt li jien għażilt,

jien nagħmel ħaqq bis-sewwa.

4Jekk titriegħed l-art u kulma fiha,

jiena nżomm sħaħ il-pilastri tagħha.”

5Lill-kburin ngħidilhom: “La titkabbrux,”

u lill-ħżiena: “La terfgħux raskom.”

6Terfgħux kontra s-sema raskom;

titkabbrux ma’ Alla bi kliemkom.

7Għax ebda għajnuna ma ssibu,

la mil-Lvant, la mill-Punent,

la mit-Tramuntana u lanqas minn Nofsinhar;

8għax Alla hu l-imħallef:

lil wieħed iniżżlu, lil ieħor jgħollih.

9Il-Mulej għandu f’idu bieqja,

bi nbid qawwi, imħawwar tajjeb;

minnha jisqihom sal-aħħar qatra:

il-ħżiena kollha tal-art jixorbuha.

10Iżda jien għal dejjem nifraħ;

ngħanni lil Alla ta’ Ġakobb.

11L-irjus kollha tal-ħżiena jitkissru;

u jintrefgħu l-irjus tal-ġusti.