BIN SIRAK 41 - Maltese Bible with DC

Kapitlu 41Il-mewt

1O mewt, bħall-imrar tifkirtek

għal min jgħix fis-sliem ta’ ġidu,

għal min m’għandux fuqiex iħabbel rasu u riżqu tajjeb f’kollox,

u li għadu f’saħħtu biex jitpaxxa bl-ikel!

2O mewt, il-ħaqq tiegħek jogħġob

lil min hu fil-bżonn u saħħtu nieżla,

imdaħħal fiż-żmien u moħħu inkwiet fuq kollox,

u lil wieħed li ma joqgħod għal xejn u tilef sabru.

3Tibżax mill-piena tal-mewt,

ftakar fiż-żmien l-imgħoddi u fl-aħħar jiem.

4Dan hu l-ordni ta’ Alla għal kull bniedem.

Għala tieqaf lir-rieda tal-Għoli?

Jekk tgħix għal għaxra, għal mija, jew għal elf sena,

f’Art l-Imwiet dwar il-ħajja m’hemm l-ebda ħsieb.Ix-xorti tal-ħżiena

5Ulied il-midinbin joħorġu tfal ta’ min jistmerrhom,

u dawk ukoll imrobbija f’dar il-ħżiena.

6Wirt ulied il-midinbin jintilef,

u nisilhom jitgħabba bl-għajb għal dejjem.

7Missier ħażin imaqdruh uliedu,

għaliex minħabba fih jitkasbru huma.

8Ħażin għalikom, nies ħżiena,

intom li tlaqtu l-Liġi ta’ Alla l-Għoli.

9Meta titwieldu, titwieldu għal saħta,

u meta tmutu, saħta jkun sehemkom.

10Kulma ġie mill-art, lejn l-art jerġa’ lura,

hekk il-ħżiena mis-saħta għat-telfien.

11Il-bnedmin jibku t-telfa ta’ ġisimhom;

u jisfa fix-xejn l-isem ħażin tal-midinbin.

12Ħu ħsieb ismek, għax dan li jibqagħlek,

iktar minn elf teżor kbir tad-deheb.

13Ħajja tajba jiemha magħduda,

imma isem tajjeb jibqa’ għal dejjem.

Sens ta’ mistħija

14Uliedi, ħarsu t-tagħlim tiegħi fis-sliem.

Għerf moħli u teżor midfun,

x’jiswew it-tnejn li huma?

15Aħjar bniedem li jaħbi bluhatu

minn bniedem li jaħbi għerfu.

16Għalhekk oqgħod għal li se ngħidlek;

għax mhux kull mistħija ta’ min jgħożżha;

u mhux kulħadd japprezzaha skont is-sewwa.

17Istħi miż-żina quddiem ommok u missierek;

mill-gideb quddiem prinċep jew xi kap;

18mill-ksur tal-liġi quddiem l-imħallef;

mill-ħtija quddiem il-ġemgħa u l-poplu;

19mill-qerq quddiem sieħeb jew ħabib;

mis-serq quddiem il-ġirien fejn toqgħod.

20Istħi quddiem il-fedeltà u l-patt ta’ Alla.

Istħi milli tqiegħed minkbek fuq il-mejda int u tiekol;

21li tieħu jew tagħti b’wiċċ imqarras;

u minn dawk li jsellmulek u ma tweġibhomx.

22Istħi milli tħares fuq mara tat-triq;

milli ddawwar wiċċek minn qrabatek;

23Milli tisraq lil ħaddieħor mis-sehem jew l-għotja tiegħu;

milli titfa’ għajnejk fuq mart ħaddieħor;

24milli jkollok x’taqsam mal-qaddejja tiegħu,

- tinxteħitx fuq friexha.

25Istħi minn ħabib għal xi kliem ta’ żebliħ,

- titgħajjarx wara li tkun tajt.

26Istħi milli ttenni u tgħid kliem li tkun smajt,

u li tikxef ħwejjeġ moħbija.

27U tkun tabilħaqq mistħi tassew,

u kulħadd ikun iġibek.