IL-KTIEB TAL-GĦERF 7 - Maltese Bible with DC

Kapitlu 7Salamun, sultan il-għerf

1Jien ukoll bniedem li jmut, bħall-oħrajn kollha,

imnissel mill-ewwel bniedem li sar mit-trab;

f’ġuf ommi ssawwart b’ġisem,

2tul żmien ta’ għaxar xhur magħqud bid-demm,

miż-żerriegħa ta’ raġel u l-pjaċir sieħeb l-irqad.

3Jiena wkoll meta twelidt, ħadt nifs li kulħadd jieħu,

waqajt fuq l-istess art li ġġibna lkoll,

bħall-oħrajn il-biki kien l-ewwel li semmajt.

4Fil-ħrieqi fisqewni u b’ħafna ħsieb rabbewni.

5Għax l-ebda sultan ma jibda ħajtu mod ieħor.

6Xorta waħda lkoll jidħlu fil-ħajja l-bnedmin,

u xorta waħda lkoll joħorġu minnha.

7Għalhekk jien tlabt u qlajt l-għaqal;

sejjaħt, u ġie fuqi l-ispirtu tal-għerf.

8Dan l-għerf qistu aqwa minn kull xettru u tron,

u ntbaħt li l-għana mhu xejn ħdejh.

9Ma xebbahtx miegħu l-ħaġra l-aktar prezzjuża,

għax id-deheb kollu ħdejh mhuwiex ħlief ftit ramel,

u l-fidda quddiemu qisha ftit tajn.

10Aktar mis-saħħa u s-sbuħija ħabbejtu,

u għoġobni aktar mid-dawl;

għax id-dija tiegħu ma tgħib qatt.

11Mal-għerf ġieni l-ġid kollu,

u miegħu ġiebli għana bla qjies.

12Jien fraħt b’dan kollu, għax kollox ġie wara l-għerf;

u ma kontx naf li hu l-bidu ta’ kollox.

13Bla qerq tgħallimtu u bla għira lill-oħrajn ngħaddih;

l-għana tiegħu ma naħbihx.

14Għax hu għall-bniedem teżor bla qjies;

dawk li jiksbuh isiru ħbieb Alla,

jogħġbuh bid-doni li jieħdu minn tagħlimu.

15Jagħtini Alla li nitkellem sewwa kif għaraft,

u naħseb kif jixraq bid-doni li tani.

Għax hu t-triq tal-għerf,

hu jmexxi l-għorrief fis-sewwa.

16F’idejh qegħdin aħna u kliemna,

u d-dehen u s-sengħa ta’ għemilna.

17Hu li tani tagħrif bla qerq ta’ kulma hawn,

li nagħraf kif inhi d-dinja u l-qawwa tal-elementi tagħha;

18il-bidu, it-tmiem u n-nofs taż-żminijiet,

it-tibdil fil-mixi tax-xemx u l-qlib tal-istaġuni,

19id-dawriet tas-snin u l-post tal-kwiekeb;

20l-għamla tal-bhejjem u l-imġiba tal-annimali;

il-qawwa tal-irjieħ, u l-ħsibijiet tal-bniedem,

it-tiżwiq tax-xtieli u s-saħħa tal-għeruq.

21Ħwejjeġ moħbija jien għaraft u dawk li jidhru;

għax għallimhomli l-għerf, li għamel kollox.

22Fl-għerf hemm spirtu

intelliġenti, qaddis, waħdieni,

ta’ ħafna għamliet, fin, u attiv;

jinfed fil-fond, u tebgħa m’hemmx fih;

ċar u ebda ħsara ma tista’ għalih;

iħobb il-ġid u misnun sewwa;

23xejn ma jżommu u l-ġid jagħmel;

iħobb il-bniedem, sod u żgur bla inkwiet;

kollox jista’ u fuq kollox jgħasses,

u fl-erwieħ kollha jidħol,

imqar f’dawk intelliġenti, safja u fini sewwa.

24Għax l-għerf jitħarrek aktar minn kull ħaġ’oħra li titħarrek;

minħabba s-safa tiegħu jidħol f’kollox u jinfirex ma’ kullimkien.

25Hu bħal daħna ħafifa tas-setgħa ta’ Alla,

nixxiegħa safja tal-glorja ta’ Dak li jista’ kollox;

għalhekk xejn imdennes ma jidħol fih.

26Hu raġġ tad-dawl ta’ dejjem,

mera bla tebgħa tas-setgħa ħaddiema ta’ Alla,

u xbieha tat-tjieba tiegħu.

27Għalkemm hu waħdu, kollox jista’,

jibqa’ dak li hu fih innifsu, u jġedded kollox;

minn żmien għal żmien jidħol f’erwieħ qaddisa,

u jagħmilhom ħbieb ta’ Alla u profeti.

28Xejn ma jħobb Alla, jekk mhux dak li jgħix mal-għerf.

29Għax l-għerf jiddi aktar mix-xemx,

u aqwa minn kull ġemgħa ta’ kwiekeb,

imxebbah mad-dawl, hu isbaħ minnu.

30Wara dawl il-jum jiġi dlam il-lejl;

imma l-għerf l-ebda ħażen ma jista’ għalih.