ISAIJA 17 - Maltese Bible with DC

Kapitlu 17L-oraklu fuq Damasku u Efrajm

1Oraklu fuq Damasku:

“Araw, Damasku ma tibqax aktar belt, imma ssir ħerba!

2Blietha għad jitilquhom għal dejjem,

u jibqgħu għall-imrieħel,

hemm jimteddu u ħadd ma jgerrixhom.

3Il-fortizza tispiċċa minn idejn Efrajm,

u s-saltna minn Damasku.

U jiġrilu fdal Aram kif se jiġri lil sebħ ulied Iżrael,

oraklu tal-Mulej tal-eżerċti.

4U jiġri f’dak il-jum li

s-sebħ ta’ Ġakobb jidbiel,

u s-simna ta’ laħmu togħlob.

5Jiġrilu bħal meta l-ħassad jaqbad iż-żara’

u driegħu jaħsad is-sbul;

u jiġrilu bħal wieħed li jiġbor is-sbul

fil-wied ta’ Refajm.

6Jifdallu biss x’erba’ żebbuġiet,

- bħal meta jfarfru ż-żebbuġa -

tnejn jew tliet żibġiet f’ras il-fergħa,

erbgħa jew ħamsa fi truf il-friegħi tas-siġra,

oraklu tal-Mulej Alla ta’ Iżrael.

7Dakinhar il-bniedem idur lejn min għamlu;

idawwar għajnejh lejn il-Qaddis ta’ Iżrael.

8Ma jħarisx iżjed lejn l-artali li għamlu jdejh,

ma jħarisx aktar fuq li għamlu subgħajh:

ix-xbihat tal-Asera u l-plieri tax-Xemx.

9Dakinhar blietek jiġrilhom bħalma ġralhom l-ibliet

abbandunati mill-Ħiwwin u l-Amurrin, meta dawn telquhom

minħabba wlied Iżrael, u saru ħerba.

10Għax int insejt lil Alla, is-Salvatur tiegħek;

ma ftakartx fil-Blata, il-Qawwa tiegħek.

Int tħawwel il-ġonna ta’ Adon;

tħawwel iż-żraġen għal alla barrani;

11iddawwarhom b’ħajt meta tħawwilhom;

u l-għada filgħodu tnibbet iż-żerriegħa tiegħek;

imma l-frott jgħib f’jum il-mard

u l-uġigħ bla fejqan.

Il-qerda tal-għedewwa

12“Ah! It-tgargir ta’ kotra ġnus,

bħat-tgargir tal-baħar qawwi.

It-tqanqil ta’ ġnus setgħana,

13bħat-tqanqil ta’ ħalel kbar.

Imma l-Mulej jheddidhom

u jaħarbu ’l bogħod

misjuqa bħal tibna fuq l-għoljiet mir-riħ,

u bħal tromba trab quddiem ir-riefnu.

14Filgħaxija kien hemm il-biża’ tagħhom,

sa minn qabel is-sebħ għabu lkoll.

Din hi x-xorti ta’ dawk li jisirquna,

dan hu s-sehem ta’ dawk li jaħtfulna ġidna.”