1Il-poplu kollu ta’ Iżrael, li kien jgħammar fil-Lhudija, sama’ b’kulma kien għamel bil-ġnus Oloferne, il-ġeneral ta’ Nabukodonosor, sultan tal-Assiri, u kif seraq is-santwarji kollha tagħhom u ġarrafhom;
2u qabadhom biża’ kbir minħabba fih, u bdew jinkwetaw ħafna minħabba Ġerusalemm u t-tempju tal-Mulej, Alla tagħhom;
3għax kienu għadhom kemm reġgħu lura mill-eżilju, u ma kienx ilu ħafna li l-poplu nġabar mil-Lhudija kollha u qaddsu mill-ġdid it-tagħmir, l-artal u t-tempju, li qabel kienu mniġġsa.
4U bagħtu nies fl-inħawi kollha tas-Samarija, f’Kona, Betħoron, Belmajn, Ġeriko, Ħoba, Esora, u Wied Salem,
5u qabdu malajr il-qċaċet tal-għoljiet u dawru bis-swar l-irħula, u ħażnu l-ikel bi tħejjija għall-gwerra, għax kienu għadhom kif ħasdu l-uċuħ tar-raba’ tagħhom.
6Ġojakim, il-qassis il-kbir, li dak iż-żmien kien Ġerusalemm, kiteb lil dawk kollha li kienu joqogħdu f’Betulja u Betamajm, li hi biswit Esdrelon, quddiem il-pjanura qrib Dotajn,
7u ordnalhom li jżommu l-mogħdijiet bejn il-muntanji, għax minnhom wieħed kien jista’ jidħol fil-Lhudija, u kienet ħaġa ħafifa ħafna li jżommu lil min kien irid jidħol minnha, għax il-mogħdija kienet dejqa, u tnejn min-nies biss setgħu jgħaddu spalla ma’ spalla.
8Ulied Iżrael għamlu kif ordnalhom Ġojakim, il-qassis il-kbir, u l-kunsill tal-poplu kollu ta’ Iżrael li kienu f’Ġerusalemm.
9Kull bniedem f’Iżrael għolla leħnu lejn Alla b’ħeġġa kbira u għakksu ruħhom b’ħafna sawm.
10Ilkoll kemm kienu, irġiel u nisa, it-tfal u l-bhejjem tagħhom, il-barranin kollha, il-ħaddiema u l-ilsiera tagħhom, ilkoll kemm kienu, xeħtu fuqhom ix-xkejjer.
13Il-Mulej sama’ t-talb tagħhom u ħares lejn l-hemm tagħhom. Il-poplu kien ilu jsum għal ħafna ġranet fil-Lhudija kollha, u f’Ġerusalemm quddiem is-santwarju tal-Mulej li jista’ kollox.
Who We AreWhat We EelieveWhat We Do
2025 by iamachristian.org,Inc All rights reserved.
