BIN SIRAK 44 - Maltese Bible with DC

Kapitlu 44Sebħ Alla fl-istorja

1Infaħħru issa lil nies ta’ ġieħ,

u lil missirijietna nisel wara ieħor.

2Il-Mulej ħejja għalihom glorja kbira,

u wera l-kobor tiegħu minn dejjem.

3Uħud kienu jaħkmu f’saltniethom,

u kienu nies li kellhom isem għal qawwiethom.

Uħud kienu jagħtu parir għax kienu jifhmu,

u kienu jħabbru bi profezija.

4Uħud kienu jmexxu l-poplu bil-parir tagħhom;

u għax kienu jifhmu fi trawwim il-poplu,

kienu jgħidu kliem għaref f’tagħlimhom.

5Uħud kienu jikkomponu l-mużika,

u ħallew versi bil-kitba tagħhom.

6Uħud kienu nies għonja mogħnija b’saħħa,

jgħixu fis-sliem fi djarhom.

7Dawn kollha kienu mweġġħin fi żmienhom,

u f’jiemhom kienu jiftaħru bihom.

8Uħud minnhom ħallew isem warajhom,

u hekk tingħad foħrithom.

9Imma hemm uħud li m’għandhomx tifkira,

u għebu bħalkieku qatt ma għexu,

u saru bħalkieku qatt ma kienu,

u hekk ukoll uliedhom warajhom.

10Imma dawn huma n-nies ta’ ħniena,

li l-għemejjel tajba tagħhom ma jintesewx.

11Għand uliedhom jibqa’ l-ġid li kellhom.

12Nisilhom joqgħod għall-patt,

u minħabba fihom uliedhom ukoll.

13Nisilhom jibqa’ għal dejjem,

u sebħhom ma jitħassarx.

14L-iġsma tagħhom midfuna fis-sliem,

imma isimhom jibqa’ ħaj minn nisel għal ieħor.

15L-għerf tagħhom jitkellem fuqu l-poplu,

u tifħirhom ixxandru l-ġemgħa.Ħenok

16Ħenok kien jogħġob lill-Mulej u l-Mulej ħadu,

kien eżempju ta’ ndiema għall-ġenerazzjonijiet kollha.Noè

17Noè nstab ġust għalkollox,

fi żmien l-għadab deher għall-oħrajn:

bis-saħħa tiegħu baqa’ fdal fuq l-art

meta ġie d-dilluvju.

18Saru miegħu pattijiet għal dejjem

biex ħadd mill-ħajjin ma jerġa’ jinqered f’dilluvju.Abraham

19Abraham, missier kbir ta’ kotra ġnus,

ma nstabx ieħor bħalu fil-ġieħ.

20Kien iħares il-Liġi tal-Għoli

u daħal miegħu f’patt;

wettaq il-patt f’ġismu,

meta ġarrbu Alla baqa’ fidil lejh.

21Għalhekk il-Mulej wiegħdu b’ġurament

li b’nislu jitbierku l-ġnus,

li jkattru daqs it-trab tal-art,

u jgħolli nislu m’ogħla l-kwiekeb,

u jagħtihom b’wirt minn baħar sa baħar,

u mix-xmara sa truf l-art.Iżakk u Ġakobb

22U lil Iżakk wiegħdu hekk ukoll

minħabba f’Abraham missieru.

23Il-barka tal-bnedmin kollha u l-patt

serraħhom fuq ras Ġakobb.

Wettqu bil-barkiet tiegħu,

u tah l-art b’wirtu;

u qasamha għalih f’partijiet

u tahom b’sehemhom lit-tnax-il tribù.