ĠEREMIJA 3 - Maltese Bible with DC

Kapitlu 3

1“Jekk raġel ikeċċi ’l martu,

u din titbiegħed minnu,

u ssir il-mara ta’ raġel ieħor,

jaqaw l-ewwel wieħed se jerġa’ lura lejha?

Mhijiex forsi mtebbgħa din l-art?

Int li żnejt ma’ ħafna ħbieb,

għandek il-ħila terġa’ għal għandi?

Oraklu tal-Mulej.

2Erfa’ għajnejk lejn l-għoljiet għerja, u ħares:

fejn ma tbahradtx?

Fit-toroq kont tkun bilqiegħda tistenniehom,

bħal Għarbi fid-deżert.

Int ċappast l-art biż-żina u l-ħażen tiegħek.

3Għalhekk inżammet ix-xita,

u xita mwaħħra naqset ukoll.

Ġbinek, ġbin ta’ mara żienja,

u l-mistħija ma ridthiex.

4Mhux issa wkoll issejjaħli: ‘Missier!

Int il-ħabib ta’ żgħożiti!

5Se tibqa’ mgħaddab għal dejjem u mmasħan sal-aħħar?’

Hekk titkellem, imma tibqa’ tagħmel ħażen kemm tiflaħ.”

Ġuda, il-mara infidila

6U l-Mulej kellimni fi żmien is-sultan Ġosija: “Rajt x’għamlet Iżrael ta’ rasha iebsa? Marret fuq kull muntanja għolja u qagħdet tiżni taħt kull siġra ħadra.

13Agħraf biss ħżunitek,

għax int qomt kontra l-Mulej, Alla tiegħek,

xerridt imħabbtek mal-barranin

taħt kull siġra tħaddar,

u minn kliemi ma ridtx tisma’!

Oraklu tal-Mulej.

14Erġgħu lura, ulied ribelli, oraklu tal-Mulej, għax jiena Sidkom. U neħodkom, wieħed minn belt u tnejn minn kull familja, u ndaħħalkom f’Sijon.

16Meta intom toktru u tnisslu fuq l-art f’dawk il-jiem, oraklu tal-Mulej, ħadd ma jitkellem aktar fuq l-arka tal-patt tal-Mulej, ma jaħsibx aktar fuqha, u ma jiftakarx fiha, ma jibkuhiex, u ma jagħmlux oħra.

18Dak iż-żmien tmur dar Ġuda f’dar Iżrael, u flimkien jiġu mill-art tat-Tramuntana fl-art li jien tajt b’wirt lill missirijiethom.

19U jien għedt: ‘Kemm nixtieq inqiegħdek fost uliedi,

u nagħtik art li tgħaxxaq,

l-isbaħ fost l-isbaħ wirt tal-ġnus.’

Jien għedt: ‘Missier issejjaħli, u minn warajja ma twarrabx.’

20Iżda bħalma mara tqarraq b’seħibha,

hekk intom, dar Iżrael, qarraqtu bija,

oraklu tal-Mulej.

21Fuq l-għoljiet għerja jinstama’ leħen,

leħen il-biki u l-krib ta’ wlied Iżrael,

għax għawġu triqithom,

insew lill-Mulej Alla tagħhom.

22Erġgħu lura, ulied ribelli,

jiena nfejjaqkom mill-ħsara tat-telfa tagħkom.’

‘Arana ġejjin għandek,

għax int il-Mulej Alla tagħna!

23Tassew qerq huma l-għoljiet,

u t-tbahrid fuq il-muntanji.

Tassew, fil-Mulej Alla tagħna

hemm is-salvazzjoni ta’ Iżrael.

24L-għajb tal-allat sa minn żgħożitna

kiel il-frott ta’ xogħol missirijietna:

l-imrieħel tagħhom u l-baqar tagħhom,

is-subien tagħhom u l-bniet tagħhom.

25Ħa nimteddu fl-għajb tagħna, u ninksew bil-mistħija,

għax dnibna kontra l-Mulej Alla tagħna,

aħna u missirijietna, sa minn żgħożitna sal-lum.

Ma smajniex minn kelmet il-Mulej, Alla tagħna.’