1Għanja tat-Telgħat.
Ftakar, Mulej, f’David
u fl-hemm tiegħu kollu.
2Ftakar kif hu ħalef lill-Mulej,
u wiegħed lil Alla, il-Qawwi ta’ Ġakobb:
3“Ma nidħolx taħt is-saqaf ta’ dari,
ma nitlax fuq il-friex ta’ soddti,
4ma nagħlaqx għajnejja u norqod
u anqas nagħlaq xfar għajnejja bin-ngħas,
5sa ma nsib post għall-Mulej,
għamara għal Alla, il-Qawwi ta’ Ġakobb.”
6Araw, smajna bl-arka f’Efrata,
sibnieha fir-raba’ ta’ Ġagħar.
7Ħa nidħlu fl-għamara tiegħu,
ninxteħtu quddiem il-mirfes ta’ riġlejh!
8Qum u ejja, Mulej, lejn il-mistrieħ tiegħek,
int u l-arka tal-qawwa tiegħek.
9Jilbsu l-ġustizzja l-qassisin tiegħek,
jgħajtu bil-ferħ il-ħbieb tiegħek.
10Minħabba f’David, il-qaddej tiegħek,
twarrabx wiċċ is-sultan, il-midluk tiegħek.
11Il-Mulej ħalef wegħda lil David,
u żgur li ma jerġax lura minnha:
“Wieħed min-nisel tiegħek
jiena nqiegħed fuq it-tron tiegħek.
12Jekk uliedek iħarsu l-patt tiegħi
u l-preċetti li jien nagħtihom,
uliedhom ukoll għal dejjem
joqogħdu fuq it-tron tiegħek.”
13Għax il-Mulej għażel ’il Sijon,
u xtaqha tkun id-dar tiegħu:
14“Hawn insib il-mistrieħ tiegħi għal dejjem!
Fiha rrid noqgħod, għax ħabbejtha!
15Bil-barka nimla l-ħażniet tagħha,
bil-ħobż inxabba’ l-foqra tagħha.
16Bis-salvazzjoni llibbes il-qassisin tagħha,
bil-ferħ jgħajtu l-ħbieb tagħha.
17Hemm inqajjem qawwa lil David,
inħejji mnara għas-sultan, il-midluk tiegħi.
18Bil-mistħija llibbes l-għedewwa tiegħu,
imma fuqu tiddi l-kuruna tiegħu.”
Who We AreWhat We EelieveWhat We Do
2025 by iamachristian.org,Inc All rights reserved.
