1Isimgħu din il-kelma,
li jien se llissen għalikom,
għanja ta’ biki, O Iżrael.
2“Waqgħet biex ma terġax tqum,
ix-xbejba ta’ Iżrael.
Minxura fl-art, ħadd ma jqajjimha.”
3Għax dan jgħid Sidi l-Mulej:
“Il-belt li ħarġet b’elf ruħ,
tibqa’ b’mija,
u dik li ħarġet b’mija,
tibqa’ b’għaxra,
għad-dar ta’ Iżrael.”
4Għax dan jgħid il-Mulej lil dar Iżrael:
“Fittxuni u tgħixu.
5La tfittxux lil Betel,
la tmorrux f’Gilgal,
la tgħaddux lejn Birsaba.
Għax Gilgal tittieħed fl-eżilju,
u Betel issir ħerba.”
6Fittxu lill-Mulej u tgħixu.
Li ma joħroġx bħan-nar għal dar Ġużeppi,
jibla’ kollox u ma jkunx hemm min jitfih,
għad-dar ta’ Iżrael.
7Intom li tibdlu l-ġustizzja fi mrar,
u tixħtu s-sewwa mal-art!
8Hu li għamel il-Plejadi u l-Orjon,
li jibdel id-dlam fis-sebħ,
u l-jiem fil-lejl mudlam;
li jsejjaħ ilmijiet il-baħar,
u jsawwabhom fuq wiċċ l-art,
Jaħweh jismu.
9Li jġiegħel tleħħ il-qerda fuq il-qawwi,
u l-qerda jġib fuq il-fortizza.
10Jobogħdu ’l min iwiddeb fil-bieb,
u jistmerru ’l min jgħid is-sewwa.
11Għax intom għakkistu l-fqir,
u teħdulu t-taxxa minn fuq il-qamħ.
Intom bnejtu djar b’ġebel minġur,
imma intom fihom ma tgħammrux.
Xettiltu oqsma sbieħ tad-dwieli,
imma l-inbid ma tixorbuhx.
12Għax naf kemm huma dnubietkom,
u ħtijietkom kemm huma kbar.
Intom tgħakksu l-bniedem sewwa,
tieħdu r-rigali,
u twarrbu l-ġustizzja mill-imsejknin fil-bieb.
13Min hu għaqli jibqa’ sieket
fi żmien bħal dan,
għax huwa żmien ħażin.
14Fittxu l-ġid, u mhux id-deni,
jekk tridu tgħixu,
u l-Mulej, Alla tal-eżerċti,
ikun magħkom, bħalma għedtu.
15Obogħdu d-deni u ħobbu l-ġid,
saħħu l-ġustizzja f’bieb il-belt;
u l-Mulej Alla tal-eżerċti
għandu mnejn iħenn għal fdal Ġużeppi.
16Għalhekk jgħid il-Mulej,
Alla tal-eżerċti, Sidi:
“Tinwiħ fil-pjazez kollha,
u fit-triqat kollha jgħajtu:
‘Jaħasra! Jaħasra!’
Isejħu lill-bidwi biex isewwed qalbu,
u l-bekkejja biex inewħu.
17Tinwiħ f’kull għalqa tad-dwieli,
għax jien se ngħaddi minn ġo nofsok,”
jgħid il-Mulej.L-eżilju ta’ Iżrael
18Jaħasra għalikom li tixtiequ Jum il-Mulej!
L-għala triduh Jum il-Mulej?
Dlam hu, u mhux dawl.
19Bħal meta wieħed jaħrab minn quddiem l-iljun,
u jiltaqa’ miegħu l-ors,
jew jidħol id-dar u jqiegħed idu mal-ħajt,
u jigdmu s-serp.
20Jaqaw mhux tassew li Jum il-Mulej
dlam u mhux dawl?
Mhuwiex swied bla ebda dija?
21Il-festi tagħkom sirt nobgħodhom u nistmerrhom,
ebda gost ma nsib fil-laqgħat tagħkom.
22Meta tressquli quddiemi
l-offerti tal-ħruq u s-sagrifiċċji tagħkom,
ma jogħġbunix,
u anqas biss inħares lejn l-offerti tas-sliem
tal-bhejjem imsemmna tagħkom.
23Warrbu minni l-għajjat tal-għana tagħkom,
ma rridx nisma’ bid-daqq tal-arpi tagħkom.
24Ħallu l-ġustizzja tgelgel bħall-ilma,
u s-sewwa bħal wied ta’ dejjem.
25Ressaqtuli, forsi, vittmi u offerti
għall-erbgħin sena fid-deżert, dar ta’ Iżrael?
26Intom iġġorru ’l Sikkut, is-sultan tagħkom,
u l-kewkba ta’ Kewan, alla tagħkom,
l-idoli li intom għamiltu għalikom.
27Imma jien neżiljakom ’l hemm minn Damasku.”
Dan jgħid il-Mulej,
Alla tal-eżerċti jismu.
Who We AreWhat We EelieveWhat We Do
2025 by iamachristian.org,Inc All rights reserved.
