MIKEA 1 - Maltese Bible with DC

Kapitlu 1

1Il-kelma tal-Mulej li ġiet lil Mikea, minn Moreset, fi żmien Ġotam, Aħaż u Ħeżekija, slaten ta’ Ġuda, li kellu dehriet dwar Samarija u Ġerusalemm.Tehdid u kundanni

2Isimgħu, popli kollha,

agħti widen, art u kulma fik:

Sidi l-Mulej ikun xhud kontrikom,

is-Sid mit-tempju mqaddes tiegħu!

3Għax, ara, il-Mulej ħiereġ mill-għamara tiegħu,

se jinżel u jirfes fuq l-għoljiet tal-art;

4il-muntanji jdubu taħtu,

u l-widien jinħallu,

bħax-xema’ quddiem in-nar,

bħall-ilma mitluq għan-niżla.

5Dan kollu minħabba d-dnub ta’ Ġakobb,

u minħabba l-ħtija ta’ dar Iżrael.

X’inhu d-dnub ta’ Ġakobb?

Mhux Samarija?

U x’inhi l-ħtija ta’ dar Ġuda?

Mhux Ġerusalemm?

6Lil Samarija nagħmilha borġ ġebel fir-raba’,

għalqa fejn ixettlu d-dwieli;

il-ġebel tagħha narmih fil-wied,

u nikxfilha s-sisien tagħha.

7L-istatwi tagħha kollha jitfarrku,

il-qligħ tagħha kollu jinbala’ fin-nar,

l-idoli tagħha kollha neqridhomlha;

għax minn qligħ in-nisa żienja ġabrithom,

u kiri tan-nisa żienja jerġgħu jsiru.Tilwim dwar l-ibliet fil-Lbiċ ta’ Ġuda

8Fuq hekk nibki u nolfoq,

immur imnażża’ u għeri,

noqgħod nibki bħax-xakalli,

u nnewwaħ bħan-ngħama.

9Għax il-ġerħa tagħha m’hemmx fejqan għaliha,

u messet ukoll lil Ġuda,

laħqet sal-bieb tal-poplu tiegħi,

sa lil Ġerusalemm.

10Tgħiduhiex f’Gatt;

tibku xejn;

f’Bet-legħafra tmiegħku fit-trab!

11Għaddi ’l hemm,

int li tgħammar f’Safir;

dawk li jgħammru f’Sanan

ma ħarġux mill-belt.

Bet-esel inqabdet sa mis-sisien tagħha,

sa mill-post qawwi tagħha.

12Qiegħda tnin bix-xewqa għall-ġid

dik li tgħammar f’Marot;

imma mingħand il-Mulej niżlet il-ħsara

f’bieb Ġerusalemm.

13Orbot iż-żiemel ġerrej fil-karru,

int li tgħammar f’Lakis;

int il-bidu tad-dnub għal bint Sijon,

għax fik instabu d-dnubiet ta’ Iżrael.

14Għalhekk ikollok tagħti r-rigali tat-tluq

lil Moreset-gat.

Bet-akżib tkun gidba

għas-slaten ta’ Iżrael.

15Għad nerġa’ nġib fuqek ’il min jirbħek,

int li tgħammar f’Maresa;

sa Għadullam għad tasal,

il-glorja ta’ Iżrael.

16Tfartas u tqarweż,

għal ulied l-għaxqa tiegħek,

il-qargħa tiegħek daqs ta’ ajkla,

għax ittieħdu fl-eżilju ’l bogħod minnek!