ĠOB 28 - Maltese Bible with DC

Kapitlu 28Innu ta’ tifħir lill-Għerf ta’ Alla

1Iva, għandha l-fidda l-minjiera tagħha

u d-deheb il-post fejn jissaffa.

2Jittieħed mit-trab il-ħadid,

u r-ram mill-ħaġar imdewweb.

3Jagħmel il-bniedem tarf għad-dlam,

sal-qiegħ nett hu jistħarreġ.

Fil-blat sewdieni u mdallam

4jaqta’ mina ’l bogħod mid-djar.

Fi mkejjen minsija mir-riġel jiddendel,

imbiegħed min-nies jitbandal.

5Dik l-art li minnha joħroġ il-ħobż,

minn taħt imqallba bin-nar.

6Minjiera taż-żaffir il-ħaġar tagħha,

it-trab tagħha fih id-deheb.

7It-triq għal hemm l-ebda għasfur tal-ħtif ma jafha,

anqas għajn il-bies ma tilmaħha.

8Ma jirfsux fuqha l-bhejjem selvaġġi,

anqas ma jgħaddi minnha l-iljun.

9Il-bniedem imidd idu għall-blata taż-żnied,

iqalleb mill-qiegħ il-muntanji.

10Minn ġol-blat jaqta’ mini,

u jaraw għajnejh minn kull ħaġar prezzjuż.

11Iħammel ir-ramel tal-widien,

u joħroġ għad-dawl ħwejjeġ moħbija.

12Imma l-għerf minn fejn jiġi,

u fejn hu postu d-dehen?

13Fejn qiegħed l-għerf ma jafx il-bniedem,

l-għerf ma jinstabx f’art il-ħajjin.

14Il-Qiegħ jistqarr: ‘Mhux fija’;

il-Baħar jgħid: ‘Mhux għandi’.

15Bl-ifjen deheb ma jinxtarax,

anqas ma jitħallas b’mitqlu fidda.

16Ma jintiżinx mad-deheb ta’ Ofir,

anqas mal-aħjar oniċi jew maż-żaffir.

17Ma jiswiex daqsu d-deheb u l-ħġieġ,

ma jinbidilx ma’ vażun tad-deheb fin.

18Il-qroll u l-kristall anqas ma nsemmuhom;

tikseb l-għerf aqwa mill-ġawhar.

19It-topaz tal-Etjopja ma jiswiex daqsu,

anqas joqgħod ħdejh id-deheb l-aktar fin.

20L-Għerf, mela, minn fejn jiġi?

U fejn hu postu d-dehen?

21Hu moħbi minn għajnejn il-ħajjin kollha,

hu mistur imqar għat-tjur tal-ajru.

22It-Telfien u l-Imwiet jgħidu:

‘B’widnejna ħadna ħbaru.’

23Triq l-Għerf Alla biss jagħrafha,

Hu biss jafu postu.

24Għax hu jħares lejn truf l-art,

u jara taħt is-sema kollu.

25Meta ffissa lir-riħ il-qawwa tiegħu,

u qassam bil-qjies l-ilmijiet;

26meta għamel sieqja għax-xita,

u triq għall-beraq tar-ragħad,

27dak il-ħin rah u qiesu,

stħarrġu għalkollox u wettqu.

28U qal lill-bniedem:

‘Ara, li tibża’ mill-Mulej hu l-għerf,

li titbiegħed mill-ħażen, l-għaqal.’