PROVERBJI 27 - Maltese Bible with DC

1Tiftaħarx bil-jum ta’ għada,

għax ma tafx x’se jġib miegħu l-jum.

2Ħa jfaħħrek ħaddieħor, iżda mhux fommok;

min hu barrani, iżda mhux xufftejk.

3Il-ġebel qawwi u r-ramel tqil,

imma qillet l-iblah itqal minnhom it-tnejn.

4Il-qilla kiefra u l-għadab ikaxkar;

imma l-għira min jista’ għaliha?

5Aħjar ċanfira f’wiċċek,

minn imħabba moħbija.

6Is-swat ta’ min iħobb, sinċier,

il-bews ta’ min jobgħod, qarrieq.

7Min hu xebgħan sal-għasel idejqu,

min hu bil-ġuħ kull morr jiġih ħelu.

8Bħal għasfur li jitbiegħed mill-bejta,

hekk hu dak li jitbiegħed minn daru.

9Il-fwieħa u l-inċens iferrħu l-qalb,

u l-ħlewwa ta’ ħabib hena tar-ruħ.

10Tinsiex lil ħabibek u ’l ħabib missierek,

tmurx f’dar ħuk meta tkun fl-inkwiet.

Aħjar ġar fil-qrib minn ħuk fil-bogħod.

11Kun għaref, ibni, u ferraħli qalbi,

biex inkun nista’ nwieġeb lil min jgħajjarni.

12Min hu bil-għaqal jara l-għawġ u jwarrab;

min moħħu ħafif jidħol fih u jħallas għalih.

13Żommlu lbiesu ’l min jagħmel tajjeb għal ħaddieħor;

żommhomlu b’rahan għal min hu barrani.

14Min ibierek lil ġaru b’leħen għoli,

sa minn sbieħ il-jum,

tistħajlu aktar qiegħed jisħtu.

15L-ilma jqattar dejjem f’jum ix-xita,

u mara ġellieda, it-tnejn xorta;

16tipprova żżommilha, qisek qed iżżomm ir-riħ,

jew taqbad b’idek iż-żejt.

17Kif il-ħadid isinn il-ħadid,

hekk bniedem jirfina lil sieħbu.

18Min jieħu ħsieb is-siġra tat-tin jiekol minn frottha,

u min iħares lil sidu jkollu l-ġieħ.

19Kif fl-ilma tara wiċċek,

hekk f’qalb ħaddieħor tara qalbek.

20Qiegħ l-Art u l-Imwiet qatt ma jimtlew;

hekk qatt ma jixbgħu għajnejn il-bniedem.

21Il-fidda tidher bin-nar u d-deheb fil-forn;

u l-bniedem jintwera bil-fomm ta’ min ifaħħru.

22Lanqas jekk tisħqu f’mehrież lill-iblah,

ma tneħħilu minn fuqu bluhatu.

23Agħraf sewwa n-nagħaġ tiegħek,

ħu ħsieb l-imrieħel tiegħek;

24għax l-għana ma jibqax għal dejjem,

u lanqas il-ġieħ minn nisel għal ieħor.

25Jintemm il-ħaxix u jidher inbiet ieħor,

u jinġabar il-ħaxix tal-għoljiet;

26il-ħrief jagħtuk x’tilbes,

il-gidjien jiswewlek daqs għalqa;

27il-mogħoż jagħtuk ħalib biżżejjed

għall-ikel tiegħek u tan-nies ta’ darek,

u għall-għajxien tax-xbejbiet tiegħek.