1F’dak il-jum jikkastiga l-Mulej bix-xabla qalila,
kbira u qawwija tiegħu
lil Levjatan, is-serp ħafif,
lil Levjatan, is-serp jitkagħweġ;
joqtol id-dragun li hemm fil-baħar.
2F’dak il-jum jgħidu:
“Għannulha lill-ġnejna tad-dwieli,
il-ġnejna fiha għaxqa!
3Jiena l-Mulej, l-għassies tagħha.
Kull ħin u kull waqt insaqqiha.
Biex ma tiġrilha ebda ħsara,
lejl u nhar jien inħarisha.
4Ma għadnix imgħaddab.
Li kien hemm ix-xewk u l-ħurrieq,
kont nagħmlilhom gwerra,
naħraqhom ilkoll f’salt wieħed,
5sakemm ma jfittxux il-kenn fija
u ma jagħmlux paċi miegħi,
u ma jagħmlux paċi miegħi.”
6U jfiġġ jum meta jxenxel għerq Ġakobb,
meta jarmi u jiżhar Iżrael,
u wiċċ id-dinja jimlewh bil-frott.
7Jaqaw darbu l-Mulej bħalma kien darab lil min darbu?
Jaqaw qatlu bħalma kien qatel lil min qatlu?
8Ikkastigahom billi keċċiehom u bagħathom ’il barra;
kaxkarhom bir-riħ qawwi tiegħu f’jum ix-Xlokk.
9B’dan tinħafer il-ħtija ta’ Ġakobb;
dan ikun il-ħlas għat-tneħħija ta’ dnubu:
li jagħmel il-ġebel tal-artal, bħal ġebel misħuq tal-ġir,
li ma jwaqqafx ix-xbihat tal-Asera u l-plieri tax-Xemx.
10Il-belt qawwija saret ħerba,
post battal, mitluq bħad-deżert;
fih jirgħa l-għoġol,
hemm jimtedd, hemm ilaqqat il-friegħi.
11Jinxfu u jitqarqċu l-friegħi tagħha,
in-nisa jiġu u bihom iqabbdu n-nar,
għax hu poplu bla moħħ;
għalhekk ma jħennx għalihom dak li ħalaqhom,
u min sawwarhom ma jagħdirhomx.
12U dakinhar jiġri
li l-Mulej jidres il-qamħ
mix-xmara tal-Ewfrat sal-Wied tal-Eġittu,
u intom tinġabru wieħed wieħed,
ulied Iżrael.
13Dakinhar tindaqq it-tromba l-kbira,
u jiġu lura l-mitlufin f’art l-Assirja,
u l-imxerrdin fl-art tal-Eġittu,
u jqimu lill-Mulej,
fuq il-muntanja mqaddsa f’Ġerusalemm.
Who We AreWhat We EelieveWhat We Do
2025 by iamachristian.org,Inc All rights reserved.
