BIN SIRAK 30 - Maltese Bible with DC

Kapitlu 30It-trobbija tal-ulied

1Min iħobb ’il ibnu, ta’ sikwit, jagħtih is-swat,

ħalli fl-aħħar ikollu biex jifraħ.

2Min lil ibnu jżommlu, ibnu jkun għalih ta’ ġieħ,

u jiftaħar bih man-nies li jafhom.

3Min irabbi tajjeb ’il ibnu jqanqal l-għira tal-għadu,

u jkun ferħan bih quddiem il-ħbieb.

4Itemm ħajtu missieru, imma daqskieku ma mietx,

għax iħalli warajh wieħed bħalu.

5Tul ħajtu rah u kellu biex jifraħ,

u meta wasal fit-tmiem ma kellux biex jitnikket.

6Ħalla warajh wieħed biex jitħallas mill-għedewwa,

u ieħor biex irodd lura lil ħbiebu l-favuri tagħhom.

7Min ifissed lil ibnu,

ikollu mbagħad jinfaxxa l-ġrieħi tiegħu stess,

u jinfena minn ġewwa bl-hemm ma’ kull għajta.

8Żiemel li mhux mans ikun ta’ rasu,

u iben mhux imrażżan ikun rasu iebsa.

9Fissed lil ibnek, u jħallik imnixxef,

iċċajta miegħu u jgħallik.

10Tidħaklux biex ma jnikktekx,

u fl-aħħar tgħażżeż snienek.

11Tagħtihx setgħat f’żgħożitu,

u tagħlaqx għajnejk għan-nuqqas tiegħu.

12Baxxilu rasu f’żgħożitu,

agħtih fuq ġenbejh sakemm għadu tifel,

li ma jmurx joħroġ rasu iebsa u ma joqgħodx għalik.

13Widdeb lil ibnek u żommlu iebes,

biex ma tixgħofx bl-għajb tiegħu.

Is-saħħa

14Aħjar fqir imma qawwi u sħiħ,

minn wieħed għani u ġismu kollu wġigħ.

15Aħjar wieħed f’saħħtu u f’siktu milli jkollu ħafna deheb,

u ġisem mibni sewwa b’ġid bla qjies,

16M’hawnx ġid aqwa mis-saħħa tal-ġisem,

u m’hawnx ferħ aqwa mill-hena tal-qalb.

17Aħjar il-mewt minn ħajja ta’ mrar,

u l-mistrieħ ta’ dejjem minn marda għal għomrok.

18Ġid imsawwab f’ħalq magħluq,

hu bħal offerti ta’ ikel fuq xi qabar.

19X’tiswa offerta tal-frott lil idolu?

Għax hu la jiekol u lanqas ixomm;

hekk min laqtu l-Mulej:

20jara b’għajnejh u jitriegħed,

bħal ewnuku li jħaddan xebba.L-hena

21Tintrebaħx min-niket

u tinfeniex bl-inkwiet.

22Hena tal-qalb hi ħajja għall-bniedem,

u l-ferħ ta’ bniedem itawwallu jiemu.

23Derri u farraġ qalbek,

u n-niket warrbu ’l bogħod,

għax in-niket wassal ħafna għat-telfien,

u ma jiswa għal xejn.

24L-għira u l-għadab iqassrulek jiemek,

u l-inkwiet żejjed ixejħek qabel iż-żmien.

25Bniedem ferrieħi jiekol bil-qalb;

u joqgħod attent x’jiekol.