SALMI 69 - Maltese Bible with DC

Salm 69Tnehid f’hemm kbir

1Għall-mexxej tal-kor. Fuq “Il-Ġilji”. Ta’ David.

2Salvani, o Alla,

għax l-ilma laħaq sa griżmejja.

3Sibt ruħi mgħaddas f’ħama fond;

ma hemmx fejn inserraħ riġlejja.

Sibt ruħi f’ilma għoli;

il-mewġ qed ikaxkarni.

4Ma niflaħx ngħajjat iżjed,

griżmejja nħanqu;

tgħammxu għajnejja,

jien u nistenna ’l Alla tiegħi.

5Dawk li għal xejn jobogħduni

huma iżjed mix-xagħar ta’ rasi;

dawk li bil-gideb jixluni

huma b’saħħithom aktar minn għadmi;

ġagħluni rrodd dak li ma sraqtx.

6Int, o Alla, taf bil-bluha tiegħi;

ħtijieti mhumiex moħbija minnek.

7Ma jinfixilx minħabba fija min jittama fik,

Mulej tal-eżerċti;

ma jistħix minħabba fija min ifittex lilek,

Alla ta’ Iżrael.

8Għax minħabba fik qiegħed nilqa’ t-tmaqdir,

u l-mistħija tiksili wiċċi.

9Sirt barrani għal ħuti;

ulied ommi ma jagħrfunix.

10Għax il-ħeġġa għal darek fnietni,

it-tagħjir ta’ min jgħajjar lilek waqa’ fuqi.

11Għakkist bis-sawm lili nnifsi,

u swieli biss biex żebilħuni.

12L-ixkora li tfajt fuqi bi lbiesi

ġibdet fuqi t-tpaċpiċ tagħhom.

13Jgħidu fuqi bilqiegħda f’bieb il-belt;

jixorbu l-inbid u jgħannu fuqi.

14Imma jien lilek nitlob, Mulej;

meta jogħġbok, o Alla, weġibni,

fil-kobor ta’ tjubitek

u skont il-wegħda tas-salvazzjoni tiegħek.

15Aqlagħni mill-ħama u ma nibqax nieżel;

ħarisni minn min jobgħodni

u eħlisni mill-ilma fond.

16Tħallix iġorrni l-ilma,

jew jiblagħni d-dagħbien,

u jingħalaq fuqi l-bir!

17Weġibni, Mulej, għax mill-aħjar tjubitek;

dur lejja fil-kobor tal-ħniena tiegħek.

18Taħbix wiċċek mill-qaddej tiegħek;

fittex weġibni, għax ninsab fil-hemm.

19Ersaq qrib lejja u ifdini;

eħlisni minħabba l-għedewwa tiegħi.

20Int taf bit-tkasbir u l-mistħija u l-għajb tiegħi;

quddiemek huma l-għedewwa kollha tiegħi.

21It-tagħjir qasamli qalbi u fnieni;

fittixt min jagħdirni, u ma sibt ’il ħadd;

u min ifarraġni, u ma kelli ’l ħadd.

22Tawni b’ikel il-velenu;

sqewni l-ħall meta kont bil-għatx.

23Tkun il-mejda tagħhom xibka quddiemhom,

u sħabhom stess in-nassa tagħhom.

24Jiddallmu għajnejhom biex ma jarawx,

jirtogħdu f’ġenbejhom għal dejjem.

25Ixħet fuqhom il-qilla tiegħek;

jaħkimhom l-għadab imħeġġeġ tiegħek.

26Isiru ħerba l-għamajjar tagħhom;

ħadd ma jgħammar fl-għerejjex tagħhom.

27Lil min int sawwatt jagħmlu għalih,

u jxandru t-tbatija ta’ min inti lħaqt.

28Agħtihom kastig fuq ieħor;

ma jilħqux is-salvazzjoni tiegħek.

29Jitħassru mill-ktieb tal-ħajjin;

ma jinkitbux man-nies sewwa.

30Imma jiena msejken u batut;

terfagħni, o Alla, is-salvazzjoni tiegħek!

31Infaħħar l-isem ta’ Alla bl-għana,

inkabbru b’għana ta’ radd il-ħajr.

32Dan jogħġob lill-Mulej aktar minn offerta ta’ gendus,

jew ta’ barri bil-qrun u dwiefer ħierġa.

33Hekk jaraw l-imsejkna u jifirħu;

u tagħmlu l-qalb, intom li tfittxu lil Alla.

34Għax jisma’ l-fqajrin il-Mulej,

ma jistmellx l-imjassrin tiegħu.

35Ifaħħruh is-sema u l-art,

l-ibħra u kulma jitħarrek fihom.

36Għax Alla jsalva ’l Sijon,

u jibni l-bliet ta’ Ġuda;

u huma jerġgħu lura u jgħammru fiha.

37Jirtuha wlied il-qaddejja tiegħu;

dawk li jħobbu lil ismu joqogħdu fiha.